10.10.2003 кунлик архив

Инсон ҳуқуқлари ҳимоячиси Мавжуда Отақулова ҳибсга олинди

 

9 октябрь куни кечқурун Фарғона вилояти Олтиариқ тумани Ҳамза шаҳарчасидаги Навоий маҳалла фуқаролар йиғини раиси, «Ўтюраклар» клуби фаоли Мавжуда Отақулова туман прокуратураси санкцияси асосида қамоққа олинди.

Хабарларга қараганда, у Ўзбекистон Жиноят кодексининг 229 (ўзбошимчалик, яъни ҳақиқий ёки фараз қилинган ҳуқуқларни ўзбошимчалик билан амалга ошириш…) ва 277 (безорилик, яъни жамиятда юриш-туриш қоидаларини қасддан менсимаслик…) моддалари билан айбланмоқда.

Мавжуда Отақулова инсон ҳуқуқлари ҳимоячиси ва фоҳишабозликка қарши фаол курашувчи сифатида вилоятда танилган шахсдир.

Инсон ҳуқуқлари ҳимоячилари «Халқ сўзи»даги мақолага эътироз билдирди

10 октябрь куни «Freedom house» ташкилотининг Тошкентдаги ваколатхонасида инсон ҳуқуқлари ҳимояси билан шуғулланувчи ташкилотлар вакиллари матбуот анжумани ўтказди.

Анжуманда яқинда «Халқ сўзи» ва «Народное слово» газеталарида чоп этилган «Қонунбузар ким: маҳалла қўмитасими ёки Ҳьюман райтс уотч» мақоласи юзасидан мулоҳазалар билдирилди.