Намоз Нормўминнинг аризаси, таржимаи ҳоли ва сайловолди дастури

А Р И З А

Ўзбекистон Республикасида Ислом Каримов диктатура режимининг тугатилиб, унинг ўрнига халқимизнинг эътиқоди, маънавияти ва тарихига ҳамда умуминсоний тараққиётининг ижобий жиҳатларига мос келадиган тараққийпарвар тузумнинг ўрнатилишига ҳисса қўшиш мақсадида виртуал сайловларда мени мухолифатчи мустақил номзод сифатида рўйхатга олишингизни сўрайман.

Ҳурмат билан Намоз НОРМЎМИН

08. 02. 2015 й.

*****

Т А Р Ж И М А И  Ҳ О Л

Тўлиқ Исми: Намоз Нормўмин ўғли Муҳаммад (Совет даврида Намоз Нормўминович Маматқулов)

Туғилган куни ва жойи: 1 Май 1957 йил. Сурхондарё вилоятининг Денов тумани.

Маълумоти: Олий. 1980 йилда Тошкент Тиббиёт Институтининг (ТошМИ) даъволаш факультетини битирган.

Оиласи: Оилали, 3 фарзанди ва 3 невараси бор.

Иш тажрибаси: 1980 ва 1993 йиллар орасида Сурхондарё вилояти, Тошкент ва Киев шаҳри касалхоналарида жарроҳ бўлиб ишлаган. Биринчи даражали жарроҳ даражасига эришган.

Сиёсий ва ижтимоий фаолият тажрибаси: 1990 “Эрк” партиясининг аъзоси ва Сурхондарё вилоятининг котиби сифатида сиёсий фаолиятга бошлади. Ўзбекистон мустақиллиги учун курашда фаол иштирок этди. Термиз шаҳрида мухолфатнинг “Адолат” номли газетасининг нашр қилинишига раҳбарлик қилди. 1993 йилда ЭРК қурултойида унинг Раиси ўрнидан маъруза қилгандан кейин сиёсий тазйиқлар натижасида хорижга чиқиб кетишга мажбур бўлди. 1995 йилда ЭРК партиясидан истеъфо қилиб, мустақил мухолифатчи сифатида фаолият олиб борди.

2011 йилдан 2013 йилгача Ўзбекистон Халқ Ҳаракати Муассислар Мажлиси ва Мувофиқлаштирувчиси сифатида фаолият кўрсатди.

2013 йилдан 2015 йилгача Туркияда “Халқаро Туркистонликлар Ҳамкорлик Жамияти”нинг муассиси ва Раис ўринбосари сифатида фаолият кўрсатди.

2015 йил 8 февралда  Ўзбекистон Президенти лавозимига виртуал сайловларда мустақил мухолифатчи сифатида номзод бўлиш учун бу лавозимидан истеъфо этди.

Китоблари, мақолалари, видео ва радио суҳбатлари: Намоз Нормўмин Ўзбекистондаги ижтимоий ва сиёсий ҳаёт ва дунё сиёсати мавзуларида Ўзбек, Турк, Рус ва Норвег тилларида ёзилган 300 га мақоланинг муаллифидир. Унинг “Зиндон атрофидаги гаплар”, “Эркинлик бизга нима беради”, “Араб баҳоридан Ўзбек баҳорига”, “Ўрта Йўлни қандай топамиз?”, “Ҳақ ва ботил чегарасида”, “Özbek halkı özgürlük istiyor” (Туркча) китоблари анаънавий ва интренет нашрлари шаклида босилган. Youtube даги youtube.com/user/NN957 шахсий саҳифаси 300000 яқин марта томоша қилинган.

Биладиган тиллари: Ўзбек, Турк, Рус, Норвег, Араб (ўрта даражада) ва Инглиз (ўрта даражада) тилларини билади.

Шахсий Блоги: www.namoznormumin.blogspot.com

Youtube: www.youtube.com/user/NN957

Facebook:  www.facebook.com/namoz.normumin

Twitter: @NamozN

Mail: ortayol2010@gmail.com, namoz.mumin@gmail.com

*****

                               САЙЛОВОЛДИ ДАСТУРИ

1 БЎЛИМ: САЙЛОВ ШИОРИМ

2 БЎЛИМ: ИСЛОМ КАРИМОВ ДИКТАТУРАСИ НАТИЖАСИДА ЎЗБЕКИСТОНДА ЮЗАГА ЧИҚҚАН ИЖТИМОИЙ -СИЁСИЙ БЎҲРОННИНГ УМУМИЙ ТАЪРИФИ

3 БЎЛИМ: ИСЛОМ КАРИМОВ ДИКТАТУРАСИ ЎРНИГА ЎРНАТИЛАДИГАН ЯНГИ ЖАМИЯТНИНГ АСОСИЙ ХУСУСИЯТЛАРИ

4 БЎЛИМ: ЎЗБЕКИСТОНДА ЎТКАЗИЛИШИ ЛОЗИМ БЎЛГАН ИСЛОҲОТЛАРНИНГ АСОСИЙ ҚОИДАЛАРИ (ПРИНЦИПЛАРИ)

5 БЎЛИМ: ИСЛОМ КАРИМОВ ЎРНИГА КЕЛАДИГАН ЯНГИ ПРЕЗИДЕНТ ТЕЗЛИК БИЛАН АМАЛГА ОШИРИШИ КЕРАК БЎЛГАН АВВАЛГИ ВА ЭНГ МУҲИМ 10 ЧОРА ВА ТАДБИРЛАР

6 БЎЛИМ: ЯНГИ МАФКУРА: ЯНГИ ЖАМИЯТ ВА ДАВЛАТ ҚУРИШНИНГ ПОЙДЕВОРИДИР

7 БЎЛИМ: СИЁСИЙ ИСЛОҲОТЛАР: БОСҚИЧМА БОСҚИЧ САЙЛОВ ҚОИДАСИ

8 БЎЛИМ: ҲУҚУҚИЙ ИСЛОҲОТЛАР: ЭРКИНЛИК ВА АДОЛАТНИ БИР БИРИГА БОҒЛАШ

9 БЎЛИМ: ИҚТИСОДИЙ ИСЛОҲОТЛАР: ҲАЛОЛ МЕҲНАТ, ХУСУСИЙ МУЛКЧИЛИК, ЭРКИН ТИЖОРАТ ВА ТАДБИРКОРЛИК. ДАВЛАТ ХАЛҚНИ БОҚМАЙДИ, ХАЛҚ ЎЗИНИ ҲАМ, ДАВЛАТНИ ҲАМ БОҚАДИ.

10 БЎЛИМ: ДИН СОҲАСИДАГИ ЎЗГАРИШЛАР: ИСЛОМ ДИНИ ИМОНСИЗЛИК, ЁЛҒОН, ЗУЛМ, ПОРАХЎРЛИК ВА АХЛОҚИЙ ТУБАНЛИКЛАРНИ ЙЎҚ ҚИЛАДИГАН ЯГОНА ЧОРАДИР.

11 БЎЛИМ: ТАЪЛИМ-ТАРБИЯ ТИЗИМИ ИСЛОҲОТИ ВА ЖАМИЯТДА ОИЛАНИНГ РОЛИ. ИЖТИМОИЙ АДОЛАТ ВА ТИББИЁТ СОҲАСИНИ ТАРАҚҚИЙ ҚИЛДИРИШ.

12 БЎЛИМ: ПОРАХЎРЛИК ВА ДАВЛАТ МУЛКИНИ ТАЛОН-ТАРОЖ ҚИЛИШГА ҚАРШИ КУРАШИШ.

13 БЎЛИМ: ИСЛОМ КАРИМОВ ОИЛАСИНИ ЖИНОИЙ ЖАВОБГАРЛИККА ТОРТИШ ВА УЛАР ЎҒИРЛАГАН ПУЛЛАРНИ ЎЗБЕКИСТОНГА ҚАЙТАРИШ.

14 БЎЛИМ: ТАШҚИ СИЁСАТ: ДЎСТЛАР БИЛАН ДЎСТОНА, ДЎСТ БЎЛМАГАНЛАР БИЛАН ШАРТНОМА АСОСИДА ХАЛҚАРО МУНОСАБАТЛАР ЎРНАТИШ

15 БЎЛИМ ДИҚҚАТ: БУ ДАСТУР ЎТИШ ДАВРИГА МЎЛЖАЛЛАНГАНДИР

1 БЎЛИМ

САЙЛОВ ШИОРИМ: “БУ ДУНЁДА ВА ОХИРАТДА САОДАТЛИ БЎЛИШ УЧУН ШАХС ВА ЖАМИЯТ ҲАЁТИДА МОДДИЙ ВА МАЪНАВИЙ ҚАДРИЯТЛАРГА БИР ХИЛ ЎРИН БЕРАЙЛИК”.

2 БЎЛИМ

ИСЛОМ КАРИМОВ ДИКТАТУРАСИ НАТИЖАСИДА ЎЗБЕКИСТОНДА ЮЗАГА ЧИҚҚАН ИЖТИМОИЙ СИЁСИЙ БЎҲРОННИНГ УМУМИЙ ТАЪРИФИ

Ўзбекистон бугун боши берк кўчага кириб қолган бир “автобусга” ўхшайди. Бу “автобус”нинг ҳайдовчиси ақли паст ва маст аласт, йўловчилари йўлдан ҳам, ҳайдовчидан ҳам безган ҳолдадир. Бугун бу “автобус”ни олдинга ҳайдашнинг ҳам орқага буриб олишнинг ҳам имкони йўқ. Бунинг устига автобусга сиғмай қолган ғазабнок йўлчилар ҳайдовчини лаънатлаб, қўлларида тошу таёқлар билан автобуснинг орқасидан қувиб юришибди…

Бундай вазиятда ягона чора ҳорғин ва асаблари чарчаган йўлчиларнинг охирги кучларини йиғиб, ўзларининг ораларидан ақли бошида янги бир ҳайдовчи танлашлари ва бу ҳайдовчининг раҳбарлигида автобуснинг рулига ёпишиб олган ақли паст ва маст аласт ҳайдовчини ўрнидан улоқтиришларидир. Янги ҳайдовчининг вазифаси эса аввал йўловчиларни сокинлаштириб, хароб бўлган автобусни орқа “скорост”да, йўловчилар орасида ур-тўполон чиқармай ва автобуснинг ағдарилишига йўл қўймай, аста секинлик билан орқага ҳайдаб, 25 йил олдин нотўғри йўлга кирган бу “автобус”ни тўғри ва катта йўлга олиб чиқишидир…

Ўзбекистонда Ислом Каримов диктатураси мустақилликдан кейинги йилларида:

Халқимизнинг эътиқодини ва маънавиятини оёқ ости қилди.

Сиёсий соҳани тамоман диктатурага айлантириб, Ўзбекистон халқини ўз режимининг қулига айлантирди ва уни ўз раҳбарларини сайлаш ҳуқуқидан маҳрум қилди.

Ҳуқуқ соҳасида фуқароларнинг бутун ҳақ ва ҳуқуқларини йўқ қилиб, унинг ўрнига МХХ, Ички Ишлар Вазирлиги, Судларни қонунга хилоф равишда диктатура режими манфаатлари учун ишлатди. Натижада жамият ва давлат ҳаётининг бутун соҳаларида қонунсизлик ва ҳуқуқсизлик устун бўлди

Иқтисодни вайрон қилиб, халқимизни ўз юртида камбағалларга, бошқа юртларда меҳнат қулларига айлантирди.

Ижтимоий адолатни йўқ қилиб, жамиятда ҳуқуқсизлик, порахўрлик ва зулм тузумини ўрнатди.

Диний соҳада мусулмонларга ўз динларини ўрганиш ва яшаш ҳуқуқи берилмади, ва жамият тараққиётида Ислом динининг илмий, ижтимоий ва ахлоқий қадриятларидан фойдаланишга тўсиқ қўйди. Ўз ҳуқуқларини истаган мусулмонлар бошқа тараққийпарвар инсонлар каби қатағон қилиниб, “Жаслиқ” зиндони каби замонавий концлагерларга ташланди ва уларга мисли кўрилмаган қийноқ усуллари қўлланилди.

Таълим тарбия тизимини издан чиқариб, умумий, махсус ва олий таълим даргоҳларини порахўрлик марказларига айлантирди.

Ўз диктатурасига қарши бўлган сиёсий, ҳуқуқий, иқтисодий, маданий ва диний соҳа вакилларини қатағон қилди, улардан мингларчасини қатл қилди, қамоқларда ваҳшийларча қийнади. Бу зулм режимидан жонларини қутқарганлар эса чет давлатларга муҳожир бўлишга мажбур бўлди.

Шу ҳақиқатни унутмаслик керакки, Ислом Каримов диктатураси тугагани билан унинг жамият ва давлат ҳаётидаги салбий натижаларини бартараф қилиш учун маълум Ўтиш Даври ва зарур бўлган ислоҳотларни эса босқичма босчиқ ўтказиш керак бўлади.

3 БЎЛИМ

ИСЛОМ КАРИМОВ ДИКТАТУРАСИ ЎРНИГА ЎРНАТИЛАДИГАН ЯНГИ ЖАМИЯТНИНГ АСОСИЙ ХУСУСИЯТЛАРИ

Янги жамиятнинг умумий моҳияти ва тараққиёт йўли аввало халқимизнинг эътиқодига, маънавиятига, тарихининг ва умуминсоният тараққиётининг ижобий қирраларига мос бўлиши керак.

Янги жамият моддий ва маънавий қадриятларнинг бир бирини инкор қилиши қоидасига эмас, аксинча уларнинг бир бирига мутаносиблиги (мос келиши) қоидаси устига қурилиши керак.

Янги жамият шахсларнинг ва ҳар қандай тоифаларнинг диктатурасини рад қилиши ва халқимизнинг эътиқоди, маданияти ва умуминсоният тараққиётининг ижобий тажрибасига таянган ҳолда, эркин сайловлар билан ўз ўзини бошқариш қонунига асосланиши керак.

Янги жамиятда ҳуқуқ, қонун ва адолатнинг устунлигини сўзсиз ва шартсиз таъминланиши лозим.

Никоҳ асосида қуриладиган оилавий ҳаёт ва ёш авлодларнинг маънавий ва моддий жиҳатлардан тарбияси жамиятнинг негизи сифатида кўрилиши керак.

4 БЎЛИМ

ЎЗБЕКИСТОНДА ЎТКАЗИЛИШИ ЛОЗИМ БЎЛГАН ИСЛОҲОТЛАРНИНГ АСОСИЙ ҚОИДАЛАРИ (ПРИНЦИПЛАРИ)

Ҳозирги вақтда Ўзбекистонда Ислом Каримов диктатураси шахслар, жамият ва давлатимиз ҳаётининг бутун соҳаларида чуқур инқироз ва ниҳоятда мураккаб ижтимоий сиёсий вазиятни юзага келтирди. Бундай қийин вазиятда ислоҳотларни шошма шошарлик ва аниқ режаларсиз амалга оширишга уриниш жуда фожеали оқибатларга, яъни миллий ва диний низоларга, давлат ҳокимиятнинг йиқилишига, турли шаклдаги ва даражадаги фуқаровий низоларнинг ўртага чиқишига олиб келиши мумкин.

Янги жамият қуриш ва янги давлат бошқарувини шаклантиришда энг асосий эътибор жамиятда сиёсий барқарорликни, яъни ТИНЧЛИКНИ қўришга, давлат ҳокимиятининг ИНҚИРОЗИГА йўл қўймасликка ва мана шундай шароитда ислоҳотларни босчиқма босқич ва ниҳоятда эҳтиёткорлик билан амалга оширишга қаратилиши зарур.

Ўтиш даврида ижтимоий ва сиёсий барқарорликни, яъни ТИНЧЛИКНИ ушлаб туришни асосий мезон, деб билиш ва бу мезонга қаратилган сиёсат олиб боришимиз лозим. Бунинг учун марказий ва маҳаллий бошқарувни аста секинлик билан ислоҳот қилиш ва Ислом Каримов режимининг жиноятларига бевосита шерик бўлмаган кадрларни ўз ўрнида тутиб, улардан ислоҳотларнинг амалга ошишида фойдаланиш зарур.

Ислоҳотларни босқичма босқич амалга ошириш ва ҳар босқичнинг моҳиятини Ўзбекистон халқига эълон қилиб боришимиз керак.

Янги Президент ва у бошқарадиган ҳукумат ўз вазифасини бошлаши билан жамият ҳаётида ва давлат органлари фаолиятида ҳуқуқ, қонунлар ва адолатнинг устунлиги амалда таъминланиши керак.

Ислоҳотларни ошкоралик муҳитида ўтказиш шарт. Бунинг учун оммавий ахборот воситларининг эркинлиги қонунлар асосида таъминлашини шарт.

Кадрларни танлашда таниш билишликка эмас, уларнинг илми, лаёқати, эътиқодли, ўз ишининг мутахассислиги эканлигига эътибор бериш лозим.

Фуқароларга эркинликларнинг чегарасиз эмаслигини, инсон ҳақ ва ҳуқуқларининг, сўз, фикр, эътиқод ва оммавий ахборот воситаларининг эркнлигининг таъминланиши қонун ва адолат қоидалари чегарасида бўлиши эълон қилиниши керак.

Аввал Ҳуқуқ тартибот, яъни Ички Ишлар Вазирлиги ва бошқармалари ходимларининг, яъни милиция ва турли даражадаги милиция раҳбарларининг адолатли қонунларга итоат қилишларини таъминлаш лозим. Худди шундай мамлакат марказий ва маҳаллий идоралари раҳбарлари ва оддий фуқаролар ҳам адолатли қонунларга итоат қилишлари лозим бўлади. Чунки ислом Каримов режимининг энг катта фожеаси УМУМИЙ ҚОНУНСИЗЛИКдир.

5 БЎЛИМ

ИСЛОМ КАРИМОВ ЎРНИГА КЕЛАДИГАН ЯНГИ ПРЕЗИДЕНТ ТЕЗ АМАЛГА ОШИРИШИ КЕРАК БЎЛГАН ЭНГ МУҲИМ 10 ЧОРА ВА ТАДБИРЛАР:

Давлат ҳокимиятининг издан чиқмаслиги ва жамиятда тўс тўполонлар бошланиб кетмаслиги учун янги Президент фақат Ислом Каримовнинг бош маслаҳатчиларини, Бош Вазирни ва Вазирларини, Ўзбекистон Бош Прокурори, МХХ Раиси ва вилоят ҳокимларинигина лавозимидан четлаштириши лозим. Уларнинг ўринбосарлари, Тошкент шаҳри ва вилоят ҳокимларининг ўринбосарлари, вилоят ва туманлар Ички Ишлар бошқармасининг раҳбарлари маълум муддат ўз вазифаларини давом эттиришлари керак.

Бутун маҳаллаларда ҳуқуқ тартибни сақлаш органларига ёрдам берадиган, маҳалла аҳолиси ичида яхши ахлоқи ва адолати билан ажралиб турадиган кишилардан ташкил топган кўнгилли осойиш қўриқчилари тузилиши мақсадга мувофиқ.

Зудлик билан Ўрта Осиёдаги қардош ва қондош давлатлар, яъни Қозоғистон, Қирғизистон, Тожикистон ва Туркманистон билан бу давлатларда умумий ижтимоий сиёсий барқарорликни (оддий тилда тинчликни) таъминлайдиган ҳамкорлик шартномаси имзоланиши лозим. Агар бу давлатлардан бирортаси у ёки бу сабаб билан бу шартномага қўшилмаса шартнома унга қўшилишни истаган давлатлар билан имзоланиши керак. Шартномага кўра, уни имзолаган Ўрта Осиёдаги давлатлари фуқароларининг чегаралардан визасиз ва муаммосиз ўтиши бир икки ойлик энг қисқа муддатда таъминланиши керак.

Яна Ўрта Осиё давлатлари ижтимоий, маданий, илмий ва диний соҳанинг энг илғор вакиллари иштирокида Ўрта Осиё давлатларида миллий ва диний ҳамкорлик ва тинчликни қўришга ўз ҳиссасини қўшадиган бир ГУРУҲ ташкил қилиниши ва у дарҳол бутун давлатларда ўз фаолиятини бошлаши керак.

Ўзбекистонда эркинликлар таъминлашининг шарти адолат чегарасида эканлиги ҳар куни оммавий ахборот воситалари орқали халққа эълон қилиб борилиши керак. Яъни, сўз ва фикр эркинлиги, фуқаровий жамиятлар ва ташкилотлар тузиш эркинлиги, оммавий ахборот воситалари эркинлиги, тинч намойишлар ўтказиш эркинлиги, эркин меҳнат, тижорат ва тадбиркорлик эркинлиги ФУҚАРОЛАРНИНГ жони, ақли, мол мулки, насли ва обрў эътиборининг ДАХЛСИЗЛИГИ доирасида амалга ошишини ҳар бир инсон жуда яхши тушуниб кетиши ва юқорида айтилган эркинликларни бу дахлсизликларни бузиш эвазига фойдаланадиганлар адолатли қонунлар билан жазолантирилишини ҳар бир инсон яхши тушуниб етиши керак.

Каримов режими ўрнига келган янги ҳукумат дарҳол фуқароларга эркин меҳнат, тижорат ва тадбиркорлик билан шуғулланиш учун янги қонун ва қоидаларни, шунга мос бўладиган солиқ ва божхона қоидаларини эълон қилиши керак. Чунки бундай эркинликлар ҳозирги иқтисодий бўҳронни тузатишда энг муҳим қадам ҳисобланади.

Шунингдек янги ҳукумат дарҳол хорижий мамлакатларда муҳожир сифатида яшаётган ва ишлаётган Ўзбекистон фуқароларининг ҳуқуқларини ҳимоя қилиш, уларнинг қонуний меҳнат қилишларини таъминлаш ва ватанлари Ўзбекистонга муаммосиз келиб кетишлари учун Русия ва бошқа давлат ҳукуматлари билан шартномалар тузиши керак.

Порахўрликка қарши, шунингдек халқ ва давлат мулкини талон тарож қилишга қарши қонуний чоралар кўришни кучайтириш ва бу иллатларга қарши оммавий сафарбарлик эълон қилингани ҳақида Ўзбекистон халқини оммавий ахборот воситаларидан узлуксиз хабардор қилиб бориш зарур. (Порахўрликка қарши курашнинг тафсилотлари учун дастурнинг иқтисодий ислоҳотлар бўлимига қаранг).

Ислом Каримов диктатураси томонидан сиёсий, ҳуқуқий, иқтисодий, ижодий ва диний фаолиятлари туфайли қатағон қилинган, қамоққа ташланган, сургун қилинган ёки бошқа шаклда тазйиқ ва таъқибларга учраганларни дарҳол қамоқхоналардан озод қилиш, улардан давлат номидан узр сўраб, номларини оқлаш, кўрган зарарлари учун моддий таъминот тўлаш, соғлиғи зарар кўрганларни давлат ҳисобидан бепул даволатиш лозим.

Олти ойдан бир йиллик муддат ичида аввало умумхалқ сайлов йўли билан Маҳаллалар Халқ Мажлисларини (МХМ) сайлаш лозим. Шундан кейин босқичма босқич маҳаллалар мажлисларида сайланган вакиллардан Туман Мажлислари, уларда сайланган вакиллардан Вилоят Мажлислари, уларда сайланган вакиллардан Ўзбекистон Халқ Мажлиси ЎХМ, яъни Ўзбекистон Парламенти ташкил қилиниши керак. ЎХМ (парламент) ташкил қилингандан кейин уч ой муддат ичида унинг аъзоларидан ёки ЎХМ аъзоси бўлмаса халқ тарафидан танилган ижтимоий сиёсий фаоллардан 2 ёки 3 кишини Ўзбекистон Президенти лавозимига умумхалқ сайлови ўтказилади. (Тафсилотлар учун дастурнинг “Сиёсий ислоҳотлар” бўлимига қаранг).

6 БЎЛИМ

ЯНГИ ЖАМИЯТ ВА ДАВЛАТНИНГ МАФКУРАСИ

Бугунги кунда мустақил Ўзбекистон давлати ўзининг қисқа тарихида жуда муҳим, айни пайтда ўта мураккаб босқични бошдан кечирмоқда. Халқимиз ва давлатимиз учун вазиятнинг муҳимлиги Ўзбекистонни 25 йилдир диктаторлик усули билан бошқариб келаётган Президент Ислом Каримовнинг бошқарув даврининг охирига етиб бораётганидир. Вазиятнинг мураккаблиги эса диктутура тузумининг давлатмизни ва жамиятимизни ижтимоий сиёсий жиҳатдан боши берк кўчага киргизиб қўйганидир.

Ўзбекистон халқи бундан кейин Ислом Каримовни ўз Президенти сифатида кўришни истамайди. Демак, ватанимизда зудлик билан Каримовнинг режимига барҳам бериш, жамият ва давлат ҳаётининг бутун соҳаларида туб ислоҳотлар ўтказилиши зарурийдир.

Бунинг учун эса аввало давлат ва жамият мафкурасида маъноси бўлмаган «Ўзбекистон келажаги буюк давлат» шиори ўрнига “БУ ДУНЁДА ВА ОХИРАТДА САОДАТЛИ БЎЛИШ УЧУН ШАХС ВА ЖАМИЯТ ҲАЁТИДА МОДДИЙ ВА МАЪНАВИЙ ҚАДРИЯТЛАРГА БИР ХИЛ ЎРИН БЕРАЙЛИК” мафкураси ўрин олиши керак.

Бу мафкуранинг аввало инсонлар қалбида, қолаверса жамият ва давлат ҳаётида жорий қилиниши динийлик ва дунёвийликнинг бир бирини рад қилиш муаммосини ҳал қилади, яъни давлат диний бўлсинми, дунёвий (секуляр) бўлсинми деган муаммо ҳал қилинган бўлади. Чунки Ислом дини ғарбда бўлгани каби таркидунёчилик дини эмас ва динимиз ўз қоидалари доирасида инсонларга энг мукаммал дунёвий қадриятларни таъминлайди. Бу билан айни пайтда жамият ва давлат тараққиётининг ўрта, мўътадил, ҳар қандай радикалликдан узоқ тараққиёт йўли танланган бўлади. Бу эса ўз ўрнида ватанимизда ҳозирги жуда мураккаб ижтимоий сиёсий вазиятда ислоҳотларни амалга оширишнинг асосий шарти бўлган ижтимоий сиёсий барқарорликни, яъни тинчликни сақлаб туришнинг кафолати ҳам ҳисобланади.

Албатта, жамиятда ТИНЧЛИК устун бўлиши учун сиёсий ва иқтисодий ислоҳотлар ўтказилиб, фуқароларга турли эркинликлар берилиши ва уларнинг моддий аҳволи яхшиланиши лозим. Аммо ҳаммамизга маълум бўлгани каби ТИНЧЛИК жараёни аввало инсонларнинг қалбларида ва шуурларида бошланиши, яъни ҳикматли ва сермаъно МАФКУРАГА таяниши керак. Мен юқорида таклиф қилган мафкура мусулмон халқимизнинг эътиқодига ҳам мосдир.

7 БЎЛИМ

СИЁСИЙ ИСЛОҲОТЛАР: БОСҚИЧМА БОСҚИЧ САЙЛОВ ҚОИДАСИ

Сиёсий соҳанинг ислоҳоти Ислом Каримов режимини ўртадан кўтариб ташлашдаги энг муҳим ислоҳотлардан биридир. Ўзбекистон мустақил бўлгандан кейин мамлакатимиздаги диктатура режими ёлғонга асосланган ва хўжакўрсинга ўтказилган “сайловлар” йўли билан ўз ҳокимиятини асраб келди. 25 йил давомида бирон марта ҳам Ўзбекистон Президентлиги, Парламент ва маҳаллий идораларни ташкил қилишда эркин ва адолатли сайловлар ўтказилмади.

Шу билан бирга ҳозирги вазиятда, яъни мамлакатда чуқур ижтимоий, сиёсий ва иқтисодий бўҳрон ҳукмрон бўлган шартларда парламент ва президентлик сайловларини ғарб давлатларидаги каби кўппартиявийлик асосланган демократик қоидалар билан ўтказиб бўлмайди. Бу жуда катта сиёсий бўҳронлар, миллий ва диний низоларга олиб келиши мумкин. Фақат бу ҳақиқат, Ислом Каримов диктутурасининг қатағонларини оқламайди. Шу билан бирга бу ҳақиқат диктатурани тугатиш учун лозим бўлган ўтиш даврида инсон ҳуқуқларининг, эркинликларнинг, фуқароларнинг эркин меҳнат, тадбиркорлик қилиш ва эркин тижорат билан шуғулланиш ҳақларини бекор қилишни, халқимизнинг ўз эътиқодига мос келадиган фуқаровий жамият қуриш ҳуқуқи, яъни ўзининг раҳбарини ўзи сайлаш каби ҳуқуқларини ҳам бекор қилмайди.

Шунинг учун ҳам бундай вазиятда ҳокимиятнинг марказий ва маҳаллий идораларини ташкил қилиш учун қуйидаги босқичма босқич сайлов қоидасига амал қилиш зарур:

Бундай сайловларда ушбу қоидаларга амал қилинади: А) Сайловлар ошкоралик руҳида ва адолатли шартларда ўтказилади. Б) Сайловларда номзод бўладиганларнинг фойдали илмли, эътиқодли, яхши ахлоқли, адолатли ва бирор соҳада мутахассис, халқ ичида эътиборли ва обрўли бўлишига эътибор қаратилади. В) Сайловларда ҳаммага ўз дастурини танитиш учун тенг имкониятлар берилади. Г) Сайлов натижаларига ҳамма рози бўлиши керак бўлади.

Биринчи босқичда: Ўзбекистондаги бутун маҳаллаларда (5000дан 20000 минггача аҳоли яшайдиган ҳудудларда) Маҳаллалар Мажлисларини (ММ) ташкил қилиш учун умумхалқ сайловлари ўтказилади. Ушбу усул билан ҳар маҳалланинг 50 вакилдан (100 ҳам бўлиши мумкин) иборат ММ сайланади. ММ ўз Оқсоқолини ва унинг ёрамчиларини сайлайди. ММ ўз ҳудудида таълим тарбия, ҳуқуқ тартибот ишларининг сақланишига ва бошқа ижтимоий ва ташкилий масалалар учун масъул ҳисобланади. Ҳар бир Маҳалла бошқарувининг Туман бошқарувидан келган давлатнинг умумий сиёсатига оид таълимотларга итоат қилиши шарт бўлади.

Иккинчи босқичда: Маҳаллалар Мажлисларида Туман Мажлислари вакилларини сайлаш учун сайлов ўтказилади. Бу босқич сайловларда ҳам сайловларни ўтказишнинг ва номзодларни танлашнинг юқорида айтилган умумий қоидаларига амал қилинади. Шу шаклда бутун Туманларда 100 (150 ҳам бўлиши мумкин) вакилдан иборат Туман Мажлислари (ТМ) ташкил қилинади. ТМ туман ҳокимини, унинг ўринбосларларини ва бошқа раҳбарларни сайлайди ва ўз тумани ҳудудида ижтимоий, иқтисодий, таълим, ҳуқуқ тартибот ва бошқа соҳлардаги ишларни ташкил қилиш ва бошқаришдан масъул ҳисобланади. Ҳар бир Туман бошқарувининг Вилоят бошқарувидан келган давлатнинг умумий сиёсатига оид таълимотларга итоат қилиши шарт бўлади.

Учинчи босқичда: Туман Мажлисларида Вилоят Мажлислари вакилларини сайлаш учун сайлов ўтказилади. Бу босқич сайловларда ҳам сайловларни ўтказишнинг ва номзодларни танлашнинг юқорида айтилган умумий қоидаларига амал қилинади. Шу шаклда бутун Вилоятларда 150 (200 ҳам бўлиши мумкин) вакилдан иборат Вилоят Мажлислари (ВМ) ташкил қилинади. ВМ вилоят ҳокимини, унинг ўринбосларларини ва бошқа раҳбарларни сайлайди ва ўз вилояти ҳудудида ижтимоий, иқтисодий, таълим, ҳуқуқ тартибот ва бошқа соҳалардаги ишларни ташкил қилиш ва бошқаришдан масъул ҳисобланади. Ҳар бир Вилоят бошқарувининг Ўзбекистон Халқ Мажлиси (Парламенти), Президенти ва бошқа марказий идораларидан келган давлатнинг умумий сиёсатига оид таълимотларга итоат қилиши шарт бўлади.

Тўртинчи босқичда: Бутун Вилоят Мажлисларида Ўзбекистон Халқ Мажлиси (ЎХМ, яъни Парламенти) вакилларини сайлаш учун сайловлар ўтказилади. Бу босқич сайловларда ҳам сайловларни ўтказишнинг ва номзодларни танлашнинг юқорида айтилган умумий қоидаларига амал қилинади. Шу шаклда 250 (350 ҳам бўлиши мумкин) вакилдан иборат Ўзбекистон Халқ Мажлиси (ЎХМ, яъни Парламенти) ташкил қилинади. ЎХМ вазифалари қисқача қўйидагича бўлади: ЎХМ Раиси, Раис ўринбосарлари, қўмиталар ва қўмиталар раҳбарларини сайлаш. Ўзбекистон давлатида бутун ижтимоий соҳалар ташкил қилиш ва бошқариш учун қонунлар қабул қилиш. Бу қонунларнинг ижросини назорат қилиш. Ўзбекистон Президентлиги 2 ёки 3 номзодни танлаб олиб, бу лавозимга умумхалқ сайлови ўтказиш. Президент тарафидан номзоди кўрсаталадиган вазирлар ва давлатнинг бошқа марказий идораларининг раҳбарларини бу лазозимларга тасдиқлаш. Ўзбекистон Бош Прокурори ва Давлат Маҳкамалари, Асосий Қонун Маҳкамаси (Конституцион Суд), вилоят ва туман маҳкамаларининг аъзоларини сайлаш. ЎХМ бошқа вазифалари ҳам бўлиши мумкин. ЎХМ фаолияти алоҳида қонун билан тартибга солинади.

Бешинчи босқич: Сайловлар, яъни Ўзбекистон Президентлигига сайловларини ўтказиш. Ўзбекистон Халқ Мажлиси ташкил қилиниб, ўз фаолиятини бошлагандан кейин 3 ой муддат ичида ўтказилади. Бу босқич сайловларда ҳам сайловларни ўтказишнинг ва номзодларни танлашнинг юқорида айтилган умумий қоидаларига амал қилинади. Ўзбекистон Президентлигига 2 ёки 3 номзод Ўзбекистон Халқ Мажлисида танланади ва Президент умумхалқ сайлови йўли билан сайланади.

Ўзбекистон Президенти Давлатнинг раҳбари ва қуролли кучларнинг Бош қўмондони ҳисобланади. Унинг асосий вазифалари қуйидагилардан иборат бўлади: Давлат Ижро ҳокимиятини бошқариш ва бунинг учун Вазирлар Маҳкамасини ташкил қилиш. Вазирлар ва марказий давлат идораларига раҳбарлари номзодлари ЎХМ тасдиқ учун таклиф қилиш. Президент ЎХМ Раиси билан ҳамкорлик қилган ҳолда ИИВ, МХХ раҳбарлари ҳам аъзо бўладиган Давлат Хавфсизлик Кенгашини тузади ва унинг фаолиятини бошқаради. Ўзбекистон Президентининг вазифалари алоҳида қонун билан белгиланади.

8 БЎЛИМ

ҲУҚУҚИЙ ИСЛОҲОТЛАР: ЭРКИНЛИК ВА АДОЛАТНИ БИР БИРИГА БОҒЛАШ

Ҳуқуқий соҳада асос инсонларнинг жони, ақли, мол мулки, насли ва обрў эътиборининг дахлсизлигини таъминлайдиган адолатли қонунларни жорий қилишдир. Бу қонунлар доирасида фуқароларга сўз ва матбуот эркинлиги, ижтимоий ва маданий ташкилотлар тузиш эркинлиги, намойиш ва мажлислар ўтказиш эркинлиги каби эркинликлар берилади.

Шу билан бирга ҳуқуқ ва қонунларнинг устунлигини таъминлаш учун Давлат Маҳкамаси, вилоят ва туман маҳкамаларининг ижро ҳокимиятидан мустақиллигининг таъминланиши шартдир. Бундай қилинганда давлатнинг раҳбарлари ҳам, оддий фйқаролар ҳам ҳуқуқ ва қонунлар олдида тенг ҳисобланадилар ва жиноят содир қилганларида адолатли қонунлар олдида жавоб берадилар.

9 БЎЛИМ

ИҚТИСОДИЙ ИСЛОҲОТЛАР: ҲАЛОЛ МЕҲНАТ, ХУСУСИЙ МУЛКЧИЛИК, ЭРКИН ТИЖОРАТ ВА ТАДБИРКОРЛИК. ДАВЛАТ ХАЛҚНИ БОҚМАЙДИ, ХАЛҚ ЎЗИНИ ҲАМ, ДАВЛАТНИ ҲАМ БОҚАДИ.

Ҳозирги кунда Ўзбекистонда амалга оширилиши лозим бўлган ислоҳотлардан бири иқтисодий соҳадаги ислоҳотлардир. Ислом Каримов ўзининг сиёсатчи эмас (сиёсатчи бўлмаса 26 йилдир сиёсий мансабни нега эгаллаб ўтирибди!?) иқтисодчи эканлиги билан мақтансада, мустақилликдан кейинги ўтган даврда Ўзбекистон иқтисодий тамоман вайрон ҳолга келди ва ватанимиз дунёнинг энг камбағал давлатларидан бирига айланди. Халқаро манбаларга кўра иқтисодий тараққиётнинг асосий кўрсаткичи бўлган Ялпи Ички Маҳсулотнинг (ЯИМ) киши бошига тушадиган нисбати бугун 1900 доллардир. Бу кўрсаткич Қозоғизстон ва Туркияда 12 000 доллар, Норвегияда эса 50000 долларга яқиндир. Бундай иқтисодий бўҳрон натижасида Ўзбекистондан меҳнатга лаёқатли энг камида 6 миллион киши иш ва нон излаб чет мамлакатларда дарбадар бўлиб юрибдилар.

Иқтисодий соҳани ислоҳ қилиш учун уни 3 га бўлиш мақсадга мувофиқдир:

1. Давлат назорат қиладиган стратегик соҳа. Бу олтин, нефть, табиий газ, ҳарбий саноат ва ҳ.к. иқтисодий соҳалардир.

2. Давлат халққа ижарага берадиган стратегик аҳамиятга эга бўлмаган корхоналар. Шу жумладан ер ҳам ҳақиқий маънода фермерларга ижрага берилиши керак, ҳозиргидек хўжакўрсинга эмас.

3. Аҳоли тўлиқ мулк эгаси бўладиган ўрта ва кичик корхоналар ва бошқа иқтисодий соҳалар.

Бундай иқтисодий ислоҳотлар натижасида фуқароларимиз ҳақиқий маънода эркин меҳнат, тадбиркорлик ва тижорат билан шуғулланиш ҳуқуқини қўлга киритадилар ва бу қисқа муддатда инсонларнинг моддий аҳволининг яхши томонга ўзгаришига олиб келади.

Иқтисодий соҳани бундай 3 бўлимга бўлиш ва бу асосда ислоҳотлар ўтказиш билан бирга уни издан чиқараётган судхўрлик, порахўрлик, ўғрилик, давлат ва халқ мулкини талон тарож қилишга қарши адолатли қонунлар асосида ҳақиқий кураш бошланади. Шу билан солиқ ва божхона қонунлари янги шароитда мослаштирилиб, халқимизнинг эркин меҳнат билан ўзини ва давлатини таъминлаши учун имкониятлар яратилади.

Ўзбекистонга қўшни бўлган Ўрта Осиё давлатлари билан умумий иқтисодий бозор соҳаси ташкил қилиниб, Ўзбекистонда ишлаб чиқарилган маҳсулотлар ва товарларни бу умумий бозорда ва дунёнинг бошқа мамлакатларига сотиш (экспорт қилиш) қулайлаштирилади.

Ўзбекистонда Каримов диктатурасининг тугатилиш билан мамлакатмизга чет давлатлардан сармоя келиши ҳам ҳеч шубҳасиз жиддий миқдорда ортади.

Бундай иқтисодий ислоҳотлар натижасида яқин 5 йиллик муддатда Ялпи Ички Маҳсулотнинг кишига бошига тушадиган нисбатини 10 000 доллар ёки ундан ҳам кўпроққа етказиш имкони пайдо бўлади.

10 БЎЛИМ

ДИН СОҲАСИДАГИ ЎЗГАРИШЛАР: ИСЛОМ ДИНИ ИМОНСИЗЛИК, ЁЛҒОН, ЗУЛМ, ПОРАХЎРЛИК ВА АХЛОҚИЙ ТУБАНЛИКЛАРНИ ЙЎҚ ҚИЛАДИГАН ЯГОНА ЧОРАДИР.

Маълум бўлгани каби Ислом дини Аллоҳ таоло инсонларга нозил қилган сўнг илоҳий Китоб Қуръони Каримга ва пайғамбарларнинг охиргиси Муҳаммад (сав)нинг саҳиҳ Суннатларига асосланади.

Ислом динининг асосий қоидалари шулардан иборатдир:

Яккахудоликка имон келтириш ва бунинг зидди бўлган кўпхудоликни, яъни Аллоҳ таолога ширк келтиришни рад қилиш ва Муҳаммад (сав)нинг Аллоҳнинг бандаси ва пайғамбари эканлигига имон келтиришдир.

Ислом динининг ғарб дунёсидаги ва бошқа мамлакатлардаги дин тушунчасидан фарқ қилади. Ғарб дунёсида “дин” дейилганда инсонларнинг шахсий эътиқоди ва таркидунёчилик, яъни инсон ҳаётидаги моддий қадриятларга эътибор бермаслик тушунилади. Шунинг учун ҳам ғарб дунёсида бундай динни дунё ишларига, яъни ижтимоий ҳаётга аралаштирмаслик учун дунёвийлик (секуларизм) қоидасига амал қилинади.Ислом динида эса ҳам моддий ва маънавий қадриятларга бир хил даражада ўрин берилади, улар бир бирини инкор қилмайди, аксинча бир бирига маъно беради. Бу билан инсонларнинг бу дунёда ҳаётида ҳам, охират ҳаётида ҳам саодатли бўлиши назарда тутилади. Демак, Ислом динининг ўз дунёвийлик қоидалари бор ва шу сабабдан мусулмонлар кўпчиликни ташкил қиладиган жамиятларда ғарбликларни ижтимоий ҳаётида ўрин олган дунёвийлик (секуларизм) қоидасига эҳтиёж бўлмайди.

Ислом динининг намоз ўқиш, рўза тутиш, закот бериш, ҳажга бориш каби ибодатларини адо этиш жуда қулай ва мусулмонлардан жуда оз вақт ажратишни талаб қилади.

Шу билан бирга Ислом дини ҳалол бўлган нарса ва амалларни ҳаром бўлган нарса ва амаллардан ажратади, инсонда яхши алоқий хислатларни тарбиялайди.

Ҳозирги кунда Ўзбекистондаги ижтимоий ҳаётнинг инқирозига сабаб бўлган ИМОНСИЗЛИК, ЁЛҒОН, ЗУЛМ, ПОРАХЎРЛИК ВА АХЛОҚИЙ ТУБАНЛИКЛАРНИ ЙЎҚ ҚИЛАДИГАН ЯГОНА ЧОРА ИСЛОМ ДИНИДИР.

Ислом Каримов диктатурасида энг ашаддий қатағонлар Ислом дини ва унинг вакилларига қарши ўтказилиб келаётгани Ўзбекистонда ҳам, чет давлатларда ҳам жуда яхши маълумдир. Бу диктутура мингларча бегуноҳ мусулмонларни радикализм ва бошқа сохта айблар билан ўлдирди, ўн мингларчаси “Жаслиқ” концлагери каби қамоқхоналарда ваҳшийларча қийнади ва қийнамоқда. Шунингдек, Ўзбекистонда сони 10 мингга яқинлашган масжид ва жомеълар сони бугунги кунга келиб 2 мингдан ҳам оз бўлиб қолди.

Ислом дини билан алоқали жамиятда қилиниши керак бўлган ўзгаришлар қуйидагича бўлиши зарур, деб ҳасоблайман:

Биринчидан: Ислом динининг асоси бўлган тавҳидий имон, унинг ибодатлари, ижтимоий, илмий, ахлоқий ва оилавий қоидалари содда шаклда инсонларга тушунтирилиши керак. Бу шаклда асосий қисми мусулмонлардан иборат бўлган халқимиз ўз динини қулай ва нисбатан тез муддатда яхши ўрганиш имконига эга бўлади.

Иккинчидан: Хозирги кунда мусулмон мамлакатларда Ислом динини жуда яхши ўрганган ва илми билан амал қиладиган жуда кўп аҳли илмларимиз бор. Уларнинг иштирокида Мустақил Уламолар Кенгашини тузиш ўта муҳимдир. Бу Кенгашнинг вазифаси халқимизга Ислом динини ўргатиш дастурини ҳозирлаш, мусулмонлар орасидаги турли гуруҳларни ўртасида ўзаро бирлик ва ҳамкорликни таъминлаш ва диниимизнинг ибодат, ахлоқ, ҳалол ва ҳаромга оид ва ижтимоий қоидаларини шахс ва жамият ҳаётига жорий қилишнинг усуллларини ишлаб чиқиш ва буларни амалга оширишда давлат ва ҳукумат органлари билан ҳамкорлик қилишдир.

Мана шундай Исломий ўзгаришлар натижасида жамиятда аста секинлик имонийлик, яхши ахлоқ, тоат ибодатлилик, инсонлар орасида ўзаро меҳр шафқат ортиб боради, мусулмонларнинг турли гуруҳларга бўлиниб ўзаро низо қилишларига йўқ қўйилмайди, мусулмонларнинг бу дунё ва охират ҳаётида саодатли бўлишлари учун имконлар пайдо бўлади, инша Аллоҳ!

11 БЎЛИМ

ТАЪЛИМ ТАРБИЯ ТИЗИМИ ИСЛОҲОТИ ВА ЖАМИЯТДА ОИЛАНИНГ РОЛИ. ИЖТИМОИЙ АДОЛАТ ВА ТИББИЁТ СОҲАСИНИ ТАРАҚҚИЙ ҚИЛДИРИШ

Маориф, таълим тарбия соҳасида ислоҳотларни амалга ошириш халқимизнинг янги авлодларининг жисмоний ва маънавий жиҳатдан баркамол бўлиб етишишининг, шу билан бирга ватанимиз ва давлатмизнинг келажакда инқирозга юз тутмай, бутун ижтимоий соҳаларга тараққиёт қилишининг асосидир.

Бунинг учун аввало шахсларнинг имонли, яхши ахлоқли, тоат ибодатли, дунёвий ишларда моҳир мутахассислар бўлиб кетишини таъминланиши керак. Мана шундай мусулмон эркаклар ва аёллардан ташкил топадиган оилаларда болаларни чақалоқлик давридан тўғри тарбия қилиш имкони яратилади.

Таълим тарбиянинг кейинги босқичи эса, бошланғич, ўрта, ўрта махсус ва олий таълим даргоҳларидир. Бу таълим ва тарбия даргоҳларида дунёвий илмларнинг исломий илмлар билан биргаликда ўргатилиши ёш авлодларнинг имонли ва яхши ахлоқли бўлиб ўсиши билан бирга, диний таълимни давлат назоратидан чиқариш, бунинг натижасида турли ўзаро рақобат ва ҳатто хусумат қилиши мумкин бўлган турли диний оқимларнинг ўртага чиқишига тўсиқлик ҳам қилади.

Таълим тарбиянинг бутун босқичлари ва соҳаларининг давлатнинг назоратида бўлиши, турли ижтимоий табақаларга бир хил, бепул таълим тарбия бериш имконини яратиш ҳам давлатнинг асосий вазифаларидан биридир.

Давлат шунингдек, етимлар, кимсасизлар, қариялар, ҳомиладор ва ёш болали оналарни нафақалар билан таъминлаш мажбуриятидадир. Бу билан жамиятда ижтимоий адолат ўрнатилади.

Тиббий соҳанинг тараққий қилиши мамлакат ва давлатнинг аввало иқтисодий жиҳатдан кучли бўлишига, инсонлар истеъмол қиладиган сув, озиқ овқатларнинг табиийлигига ва атроф муҳитнинг тозалигига боғлиқдир. Давлат ўз фуқароларининг сиҳатини қўриш учун тўғри сиёсат олиб бориши ва касалхонларда бепул даволанишни йўлга қўйиши зарур.

12 БЎЛИМ

ПОРАХЎРЛИК ВА ДАВЛАТ МУЛКИНИ ТАЛОН ТАРОЖ ҚИЛИШГА ҚАРШИ КУРАШ

Ҳозирги кунда Ўзбекистондаги диктатуранинг энг жирканч натижаларидан бири жамият ва давлат ҳаётининг бутун соҳаларида порахўрлик, таъмагирлик, халқ ва давлат мулкини ўғирлашнинг беқиёс даражада тарқалганлиги, яъни оммавий тус олганлигидир. Давлат идоралари учун оддий ҳолга айланган бу иллатнинг, таълим тарбия ва ҳатто диний идора фаолиятида (масалан, умра ва ҳажга боришдаги порахўрликлар) ўрин олишини бир миллий фожеа сифатида баҳолаш мумкиндир.

Порахўрлик, таъмагирлик, халқ ва давлат мулкини ўғирлашга қарши қуйидаги чора ва тадбирлар ишлатиши лозим:

Аввало Ўзбекистонда Каримов диктатурси тугатилиб, ушбу дастурда баён қилинган мафкуравий, сиёсий, ҳуқуқий, иқтисодий ва таълим тарбиявий ислоҳотлар амалга оширилиши шарт. Шунда жамиятда қонун ва ҳуқуқларнинг устунлиги таъминланади, фуқароларда имон ва тақво хусусиятлари пайдо бўлади, иқтисодий исдлоҳотлар натижасида умумий камбағаллик ўртадан кўтарилиб, ҳар бир шахс ва корхоналар учун ҳалол меҳнат, қонунларга кўра фаолият ва ҳалол фойдага эга бўлиш имкони яратилади. Бу эса ўз ўзидан инсонлар қалбида ва жамиятда тўғрилик ва адолатнинг устун бўлишига олиб келади.

Шу билан бирга порахўрлик, таъмагирлик, халқ ва давлат мулкини ўғирлашга, давлат идораларида бундай иллатлар билан шуғулланадиганларга қарши қатъий қонуний чоралар кўрилиши керак бўлади. Баъзи давлатларда бундай жиноятларга қарши ўлим жазоси ишлатилиши ҳам маълум. Ўзбекистонда эса ўтиш даврида бундай жиноят қилганларга энг камида 10 йилдан 15 йилгача қамоқ жазоси берилиб, порахўрлик ва ўғрилик билан ортирган мол мулки мусодара қилиниши керак, деб ҳислоблайман.

13 БЎЛИМ

ИСЛОМ КАРИМОВ ОИЛАСИНИ ЖИНОИЙ ЖАВОБГАРЛИККА ТОРТИШ ВА УЛАР ЎҒИРЛАГАН ПУЛЛАРНИ ЎЗБЕКИСТОНГА ҚАЙТАРИШ

Ислом Каримов нафақат диктатор сифатида Ўзбекистон халқи ва давлатига қарши мислсиз жиноятлар содир қилди, балки унинг оиласи, яъни хотини ва қизлари Гулнора ва Лола Каримовалар ҳам оталарнинг қўллаб қувватлаши натижасида жуда катта ҳуқуқий, иқтисодий ва маънавий жиноятларга қўл урдилар. Бу ерда Татъяна Каримованинг жияни Акбарали Абдуллаевнинг кўра бир неча корхонадан «нақд кўринишда 800 миллион АҚШ долларидан ошиқроқ» маблағни ноқонуний ўзлаштиришда айблангани (бу ҳақда“Озодлик” радиоси хабар ҳам берганди), Гулнора Каримованинг Ўзбекистонда ва Швецария, Швеция ва Норвегия каби давлатларда иқтисодий жиноятларга шерик бўлгани, Гулнора ва Лола Каримоваларнинг Ўзбекистондан ўғирланган 1 Миллиард долларга яқин пулни ғарб давлатларидаги банкларида сақлаётганини айтишнинг ўзи бу оиланинг халқимиз ва давлатимизга қарши қандай қабиҳ жиноятлар қилганини тушуниб етиш учун етарлидир.

Ислом Каримов умрининг охиригача ўз мансабини тарк қилмасликка қарор берганинг асосий сабаби ҳам ўзининг бу жиноятлари учун жавоб беришдан қаттиқ қўрқишидир. Каримов умрбод тахтида ўтирадими йўқми, буни фақат келажак кўрсатади. Бу амалга ошганда ҳам унинг хотини, қизлари ва уларнинг яқинлари албатта яқин келажакда қилган жиноятлари учун адолатли қонунлар олдида жавоб беришлари керак бўлади.

Гулнора ва Лола Каримоваларнинг Ўзбекистондан ўғирланган ва ғарб давлатларидаги банкларида сақланаётган 1 миллиард долларга яқин пулларни қайтариш учун халқаро қонунлар доирасида бу ҳукуматларга Каримов оиласининг жиноятларига далил бўладиган бутун ҳужжатлар билан мурожаат қилинади. Бу пуллар қайтарилиши учун бу давлатлар билан яхши иқтисодий алоқалар ва шартномалар тузиш ҳам шарт сифатида қўйилиши мумкин.

14 БЎЛИМ

ТАШҚИ СИЁСАТ: ДЎСТЛАР БИЛАН ДЎСТОНА, ДЎСТ БЎЛМАГАНЛАР БИЛАН ШАРТНОМА АСОСИДА ХАЛҚАРО МУНОСАБАТЛАР ЎРНАТИШ

Ташқи сиёсатда зудлик билан Ўзбекистон, Қозоғистон, Тожикистон, Қирғизистон ва Турманистон ўртасида Оврупо Иттифоқига ўхшаш, фақат мусулмон халқларимизнинг эътиқодий ва яхши ахлоқий хусусиятларини ҳисобга олган ҳолда Ўрта Осиё давлатлари Иттифоқини тузиш ва бу давлатда умумий иқтисодий ва маданий ҳудудни ташкил қилиш. Ўрта Осиё давлатлари орасида бундай Иттифоқнинг тузилиши халқларимизнинг маънавий, маданий, иқтисодий тараққиётига ҳисса қўшгани каби, инсонларимиз орасида қариндош-уруғчилик, қуда-андачиликнинг ривожланишига, миллий ва бошқа низоларнинг олдини олишга ҳам замин яратади.

Шу билан бирга Ўзбекистон Туркия ва аҳолиси асосан мусулмонлардан иборат бошқа давлатлар билан дўстона муносабатлар ўрнатиши, қолган давлатлар билан эса ўзаро мнафаатларни ҳисобга оладиган шартномалар асосида муносабатлар ўрнатиши мақсадга мувофиқдир.

15 БЎЛИМ

ДИҚҚАТ: БУ ДАСТУР ЎТИШ ДАВРИГА МЎЛЖАЛЛАНГАНДИР

Мана шундай содда айни пайтда жамият ва давлат ҳаётида ижтимоий ва сиёсий ларзаларга сабаб бўлмайдиган дастур асосида аста секинлик билан ва босқичма-босқич Каримов диктатураси келтириб чиқарган ижтимоий, сиёсий, маънавий ва иқтисодий бўҳрондан қутулиш мумкин, деб ҳисоблайман.

Яъни, бу дастур Ислом Каримов диктатурасидан қутулиш ва янги жамият ва давлат қуришда мутлақо зарур бўлган ЎТИШ ДАВРИГА мўлжаллангандир.

Бундай Ўтиш Даврининг муваффақиятли ўтаётганига мамлакатимизда эркинликлар шароитида ижтимоий ва сиёсий барқарорликнинг (тинчлик) ўрнатилгани, иқтисодий тараққиётнинг, маданият ва маънавиятнинг, ҳуқуқ ва қонунлар устунлигининг шахслар ва жамият ҳаётида ўрин олаётгани, инсонларимизнинг, айниқса янги авлодларнинг фойдали илмлар, яхши ахлоқ ва яхши мутахассислар бўлиб етишаётгани, Ўзбекистон давлатининг Ўрта Осиёда ва дунёда обрў эътиборининг ошиб бораётгани далил бўла олади. Ўтиш даври тугагандан кейин эса халқимиз учун унинг эътиқодига, маънавиятига ва тарихига мос келадиган янада тараққийпарвар бир жамият ва давлат қуриш имкони пайдо бўлади.

ҚИСҚА ХУЛОСАЛАРИМ

Биринчи қисқа хулосам: Ушбу дастур эълон қилингандан кейин Ўзбекистондаги диктатура режими бу дастурни Ўзбекистон Конституциясига зид, мени эса Конституцияга тажовуз қилувчи шахс, дея эълон қилиши мумкин. Аввало Ўзбекистоннинг ҳозирги Конституциясига тажовуз қилаётган Ислом Каримовнинг шахсан ўзидир. У тўрт марта Президентликка номзод бўлиш ва икки марта Ўзбекистон Конституциясига ўзгартиришлар киритиш билан ўзининг Президентлик муддатини яна икки марта ноқонуний узайтириши бу Конституциясини оёқ ости қилганига далилдир. Қолаверса, менинг ушбу дастурим унда айтилгани каби халқимизнинг эътиқодий ва маънавий қадриятлари ҳамда умуминсоният тараққиётининг ижобий тажрибаларига асосланади. Демак, бу дастурга амал қилиш ҳеч шак шубҳасиз халқимизнинг ва давлатимизнинг манфаати учун фойдали бўлади.

Иккинчи қисқа хулосам: Мен Ўзбекистон президентлигига виртуал сайловларнинг ташкил қилинишини халқимиз ва айниқса Ислом Каримов диктатурасига қарши курашаётган мухолифат фаолиятида жуда муҳим бир қадам ва жараён, деб биламан. Чунки мухолифатнинг бу қадами ва бу жараён диктатура зулмига қарши бўлганларга адолат учун овозларини баралла чиқаришга, ўз дастурларини эркин майдонда ўртага қўйишларига, бу орқали халқимизнинг бутун тараққийпарвар фарзандларининг бир-бирларини танишларига ва келажакда ватанимиз ва давлатимиз равнақи учун ўзаро ҳамкорлик қилишларига имконият ҳам яратди.

Мен ушбу ташаббус билан чиққан бутун мухолифатчиларга ўз ташаккуримни билдираман. Виртуал сайловлардаги рақибларимга яхши тилаклар изҳор қиламан.

Виртуал сайловларда қайси номзод ғолиб келишидан қатъий назар, сайловлар тугаганган кейин уни ташкил қилган ва унда иштирок этган мухолифатчилар, шунингдек Ислом Каримов режимнинг сохта сайловларида эмас, виртуал бўлса ҳам ҳақиқий сайловлар бўлган бу сайловларда овоз берган бутун ҳамюртларимизни ўзаро ҳамкорликка даъват қиламан.

Ҳурмат билан

Намоз НОРМЎМИН

10.02 2015

…………………………….

O‘ZBEKISTON PREZIDENTLIGIGA VIRTUAL SAYLOVLARDA
NOMZOD NAMOZ NORMO‘MINNING DASTURI

1 BO‘LIM: SAYLOV ShIORIM

2 BO‘LIM: ISLOM KARIMOV DIKTATURASI NATIJASIDA O‘ZBEKISTONDA YuZAGA ChIQQAN IJTIMOIY -SIYОSIY BO‘HRONNING UMUMIY TA’RIFI

3 BO‘LIM: ISLOM KARIMOV DIKTATURASI O‘RNIGA O‘RNATILADIGAN YaNGI JAMIYaTNING ASOSIY XUSUSIYaTLARI

4 BO‘LIM: O‘ZBEKISTONDA O‘TKAZILIShI LOZIM BO‘LGAN ISLOHOTLARNING ASOSIY QOIDALARI (PRINSIPLARI)

5 BO‘LIM: ISLOM KARIMOV O‘RNIGA KELADIGAN YaNGI PREZIDENT TEZLIK BILAN AMALGA OShIRIShI KERAK BO‘LGAN AVVALGI VA ENG MUHIM 10 ChORA VA TADBIRLAR

6 BO‘LIM: YaNGI MAFKURA: YaNGI JAMIYaT VA DAVLAT QURIShNING POYDEVORIDIR

7 BO‘LIM: SIYoSIY ISLOHOTLAR: BOSQIChMA BOSQICh SAYLOV QOIDASI

8 BO‘LIM: HUQUQIY ISLOHOTLAR: ERKINLIK VA ADOLATNI BIR BIRIGA BOG‘LASh

9 BO‘LIM: IQTISODIY ISLOHOTLAR: HALOL MEHNAT, XUSUSIY MULKChILIK, ERKIN TIJORAT VA TADBIRKORLIK. DAVLAT XALQNI BOQMAYDI, XALQ O‘ZINI HAM, DAVLATNI HAM BOQADI.

10 BO‘LIM: DIN SOHASIDAGI O‘ZGARIShLAR: ISLOM DINI IMONSIZLIK, YoLG‘ON, ZULM, PORAXO‘RLIK VA AXLOQIY TUBANLIKLARNI YO‘Q QILADIGAN YaGONA ChORADIR.

11 BO‘LIM: TA’LIM -TARBIYa TIZIMI ISLOHOTI VA JAMIYaTDA OILANING ROLI. IJTIMOIY ADOLAT VA TIBBIYoT SOHASINI TARAQQIY QILDIRISh.

12 BO‘LIM: PORAXO‘RLIK VA DAVLAT MULKINI TALON -TAROJ QILIShGA QARShI KURAShISh.

13 BO‘LIM: ISLOM KARIMOV OILASINI JINOIY JAVOBGARLIKKA TORTISh VA ULAR O‘G‘IRLAGAN PULLARNI O‘ZBEKISTONGA QAYTARISh.

14 BO‘LIM: TAShQI SIYoSAT: DO‘STLAR BILAN DO‘STONA, DO‘ST BO‘LMAGANLAR BILAN ShARTNOMA ASOSIDA XALQARO MUNOSABATLAR O‘RNATISh

15 BO‘LIM DIQQAT: BU DASTUR O‘TISh DAVRIGA MO‘LJALLANGANDIR

1 BO‘LIM

SAYLOV ShIORIM:

“BU DUNYoDA VA OXIRATDA SAODATLI BO‘LISh UChUN ShAXS VA JAMIYaT HAYoTIDA MODDIY VA MA’NAVIY QADRIYaTLARGA BIR XIL O‘RIN BERAYLIK”.

2 BO‘LIM

ISLOM KARIMOV DIKTATURASI NATIJASIDA O‘ZBEKISTONDA YuZAGA ChIQQAN IJTIMOIY SIYoSIY BO‘HRONNING UMUMIY TA’RIFI

O‘zbekiston bugun boshi berk ko‘chaga kirib qolgan bir “avtobusga” o‘xshaydi. Bu “avtobus”ning haydovchisi aqli past va mast alast, yo‘lovchilari yo‘ldan ham, haydovchidan ham bezgan holdadir. Bugun bu “avtobus”ni oldinga haydashning ham orqaga burib olishning ham imkoni yo‘q. Buning ustiga avtobusga sig‘may qolgan g‘azabnok yo‘lchilar haydovchini la’natlab, qo‘llarida toshu tayoqlar bilan avtobusning orqasidan quvib yurishibdi…

Bunday vaziyatda yagona chora horg‘in va asablari charchagan yo‘lchilarning oxirgi kuchlarini yig‘ib, o‘zlarining oralaridan aqli boshida yangi bir haydovchi tanlashlari va bu haydovchining rahbarligida avtobusning ruliga yopishib olgan aqli past va mast alast haydovchini o‘rnidan uloqtirishlaridir. Yangi haydovchining vazifasi esa avval yo‘lovchilarni sokinlashtirib, xarob bo‘lgan avtobusni orqa “skorost”da, yo‘lovchilar orasida ur -to‘polon chiqmarmay va avtobusning ag‘darilishiga yo‘l qo‘ymay, asta sekinlik bilan orqaga haydab, 25 yil oldin noto‘g‘ri yo‘lga kirgan bu “avtobus”ni to‘g‘ri va katta yo‘lga olib chiqishidir…

O‘zbekistonda Islom Karimov diktaturasi mustaqillikdan keyingi yillarida:

— Xalqimizning e’tiqodini va ma’naviyatini oyoq osti qildi.

— Siyosiy sohani tamoman diktatura aylantirib, O‘zbekiston xalqini o‘z rujimining quliga aylantirdi va uni o‘z rahbarlarini saylash huquqidan mahrum qildi.

— Huquq sohasida fuqarolarning butun haq va huquqlarini yo‘q qilib, uning o‘rniga MXX, Ichki Ishlar Vazirligi, Sudlarni qonunga xilof ravishda diktatura rejimi manfaatlari uchun ishlatdi. Natijada jamiyat va davlat hayotining butun sohalarida qonunsizlik va huquqsizlik ustun bo‘ldi

— Iqtisodni vayron qilib, xalqimizni o‘z yurtida kambag‘allarga, boshqa yurtlarda mehnat qullariga aylantirdi.

— Ijtimoiy adolatni yo‘q qilib, jamiyatda huquqsizlik, poraxo‘rlik va zulm tuzumini o‘rnatdi.

— Diniy sohada musulmonlarga o‘z dinlarini o‘rganish va yashash huquqi berilmadi, va jamiyat taraqqiyotida Islom dinining idlmiy, ijtimoiy va axloqiy qadriyatlaridan foydalanishga to‘siq qo‘ydi. O‘z huquqlarini istagan musulmonlar boshqa taraqqiyparvar insonlar kabi qatag‘on qilinib, “Jaslik” zindoni kabi zamonaviy konslagerlarga tashlandi va ularga misli ko‘rilmagan qiynoq usullari qo‘llanildi.

— Ta’lim tarbiya tizimini izdan chiqarib, umumiy, maxsus va oliy ta’lim dargohlarini poraxo‘rlik markazlariga aylantirdi.

— O‘z diktaturasiga qarshi bo‘lgan siyosiy, huquqiy, iqtisodiy, madaniy va diniy soha vakillarini qatag‘on qildi, ulardan minglarchasini qatl qildi, qamoqlarda vahshiylarcha qiynadi. Bu zulm rejimidan jonlarini qutqarganlar esa chet davlatlarga muhojir bo‘lishga majbur bo‘ldi.

Shu haqiqatni unutmaslik kerakki, Islom Karimov diktaturasi tugagani bilan uning jamiyat va davlat hayotidagi salbiy natijalarini bartaraf qilish uchun ma’lum O‘tish Davri va zarur bo‘lgan islohotlarni esa bosqichma boschiq o‘tkazish kerak bo‘ladi.

3 BO‘LIM

ISLOM KARIMOV DIKTATURASI O‘RNIGA O‘RNATILADIGAN YaNGI JAMIYaTNING ASOSIY XUSUSIYaTLARI

1. Yangi jamiyatning umumiy mohiyati va taraqqiyot yo‘li avvalo xalqimizning e’tiqodiga, ma’naviyatiga, tarixining va umuminsoniyat taraqqiyotining ijobiy qirralariga mos bo‘lishi kerak.

2. Yangi jamiyat moddiy va ma’naviy qadriyatlarning bir birini inkor qilishi qoidasiga emas, aksincha ularning bir biriga mutanosibligi (mos kelishi) qoidasi ustiga qurilishi kerak.

3. Yangi jamiyat shaxslarning va har qanday toifalarning diktaturasini rad qilishi va xalqimizning e’tiqodi, madaniyati va umuminsoniyat taraqqiyotining ijobiy tajribasiga tayangan holda, erkin saylovlar bilan o‘z o‘zini boshqarish qonuniga asoslanishi kerak.

4. Yangi jamiyatda huquq, qonun va adolatning ustunligini so‘zsiz va shartsiz ta’minlanishi lozim.

5. Nikoh asosida quriladigan oilaviy hayot va yosh avlodlarning ma’naviy va moddiy jihatlardan tarbiyasi jamiyatning negizi sifatida ko‘rilishi kerak.

4 BO‘LIM

O‘ZBEKISTONDA O‘TKAZILIShI LOZIM BO‘LGAN ISLOHOTLARNING ASOSIY QOIDALARI (PRINSIPLARI)

1. Hozirgi vaqtda O‘zbekistonda Islom Karimov diktaturasi shaxslar, jamiyat va davlatimiz hayotining butun sohalarida chuqur inqiroz va nihoyatda murakkab ijtimoiy siyosiy vaziyatni yuzaga keltirdi. Bunday qiyin vaziyatda islohotlarni shoshma shosharlik va aniq rejalarsiz amalga oshirishga urinish juda fojeali oqibatlarga, ya’ni milliy va diniy nizolarga, davlat hokimiyatning yiqilishiga, turli shakldagi va darajadagi fuqaroviy nizolarning o‘rtaga chiqishiga olib kelishi mumkin.

Yangi jamiyat qurish va yangi davlat boshqaruvini shaklantirishda eng asosiy e’tibor jamiyatda siyosiy barqarorlikni, ya’ni TINChLIKNI qo‘rishga, davlat hokimiyatining INQIROZIGA yo‘l qo‘ymaslikka va mana shunday sharoitda islohotlarni boschiqma bosqich va nihoyatda ehtiyotkorlik bilan amalga oshirishga qaratilishi zarur.

2. O‘tish davrida ijtimoiy va siyosiy barqarorlikni, ya’ni TINChLIKNI ushlab turishni asosiy mezon, deb bilish va bu mezonga qaratilgan siyosat olib borishimiz lozim. Buning uchun markaziy va mahalliy boshqaruvni asta sekinlik bilan islohot qilish va Islom Karimov rejimining jinoyatlariga bevosita sherik bo‘lmagan kadrlarni o‘z o‘rnida tutib, ulardan islohotlarning amalga oshishida foydalanish zarur.

3. Islohotlarni bosqichma bosqich amalga oshirish va har bosqichning mohiyatini O‘zbekiston xalqiga e’lon qilib borishimiz kerak.

4. Yangi Prezident va u boshqaradigan hukumat o‘z vazifasini boshlashi bilan jamiyat hayotida va davlat organlari faoliyatida huquq, qonunlar va adolatning ustunligi amalda ta’minlanishi kerak.

5. Islohotlarni oshkoralik muhitida o‘tkazish shart. Buning uchun ommaviy axborot vositlarining erkinligi qonunlar asosida ta’minlashini shart.

6. Kadrlarni tanlashda tanish bilishlikka emas, ularning ilmi, layoqati, e’tiqodli, o‘z ishining mutaxassisligi ekanligiga e’tibor berish lozim.

7. Fuqarolarga erkinliklarning chegarasiz emasligini, inson haq va huquqlarining, so‘z, fikr, e’tiqod va ommaviy axborot vositalarining erknligining ta’minlanishi qonun va adolat qoidalari chegarasida bo‘lishi e’lon qilinishi kerak.

8. Avval Huquq tartibot, ya’ni Ichki Ishlar Vazirligi va boshqarmalari xodimlarining, ya’ni militsiya va turli darajadagi militsiya rahbarlarining adolatli qonunlarga itoat qilishlarini ta’minlash lozim. Xuddi shunday mamlakat markaziy va mahalliy idoralari rahbarlari va oddiy fuqarolar ham adolatli qonunlarga itoat qilishlari lozim bo‘ladi. Chunki islom Karimov rejimining eng katta fojeasi UMUMIY QONUNSIZLIKdir.

5 BO‘LIM

ISLOM KARIMOV O‘RNIGA KELADIGAN YaNGI PREZIDENT TEZ AMALGA OShIRIShI KERAK BO‘LGAN ENG MUHIM 10 ChORA VA TADBIRLAR:

1. Davlat hokimiyatining izdan chiqmasligi va jamiyatda to‘p to‘polonlar boshlanib ketmasligi uchun yangi Prezident faqat Islom Karimovning bosh maslahatchilarini, Bosh Vazirni va Vazirlarini, O‘zbekiston Bosh Prokurori, MXX Raisi va viloyat hokimlarinigina lavozimimdan chetlashtirishi lozim. Ularning o‘rinbosarlari, Toshkent shahri va viloyat hokimlarining o‘rinbosarlari, viloyat va tumanlar Ichki Ishlar boshqarmasining rahbarlari ma’lum muddat o‘z vazifalarini davom ettirishlari kerak.

2. Butun mahallarda huquq tartibni saqlash organlariga yordam beradigan, mahalla aholisi ichida yaxshi axloqi va adolati bilan ajralib turadigan kishilardan tashkil topgan ko‘ngilli osoyish qo‘riqchilari tuzilishi maqsadga muvofiq.

3. Zudlik bilan O‘rta Osiyodagi qardosh va qondosh davlatlar, ya’ni Qozog‘iston, Qirg‘iziston, Tojikiston va Turkmaniston bilan bu davlatlarda umumiy ijtimoiy siyosiy barqarorlikni (oddiy tilda tinchlikni) ta’minlaydigan hamkorlik shartnomasi imzolanishi lozim. Agar bu davlatlardan birortasi u yoki bu sabab bilan bu shartnomaga qo‘shilmasa shartnoma unga qo‘shilishni istagan davlatlar bilan imzolanishi kerak. Shartnomaga ko‘ra, uni imzolagan O‘rta Osiyodagi davlatlari fuqarolarining chegaralardan vizasiz va muammosiz o‘tishi bir ikki oylik eng qisqa muddatda ta’minlanishi kerak.

4. Yana O‘rta Osiyo davlatlari ijtimoiy, madaniy, ilmiy va diniy sohaning eng ilg‘or vakillari ishtirokida O‘rta Osiyo davlatlarida milliy va diniy hamkorlik va tinchlikni qo‘rishga o‘z hissasini qo‘shadigan bir GURUH tashkil qilinishi va u darhol butun davlatlarda o‘z faoliyatini boshlashi kerak.

5. O‘zbekistonda erkinliklar ta’minlashining sharti adolat chegarasida ekanligi har kuni ommaviy axborot vositalari orqali xalqqa e’lon qilib borilishi kerak. Ya’ni, so‘z va fikr erkinligi, fuqaroviy jamiyatlar va tashkilotlar tuzish erkinligi, ommaviy axborot vositalari erkinligi, tinch namoyishlar o‘tkazish erkinligi, erkin mehnat, tijorat va tadbirkorlik erkinligi FUQAROLARNING joni, aqli, mol mulki, nasli va obro‘ e’tiborining DAXLSIZLIGI doirasida amalga oshishini har bir inson juda yaxshi tushunib ketishi va yuqorida aytilgan erkinliklarni bu daxlsizliklarni buzish evaziga foydalanadiganlar adolatli qonunlar bilan jazolantirilishini har bir inson yaxshi tushunib yetishi kerak.

6. Karimov rejimi o‘rniga kelgan yangi hukumat darhol fuqarolarga erkin mehnat, tijorat va tadbirkorlik bilan shug‘ullanish uchun yangi qonun va qoidalarni, shunga mos bo‘ladigan soliq va bojxona qoidalarini e’lon qilishi kerak. Chunki bunday erkinliklar hozirgi iqtisodiy bo‘hronni tuzatishda eng muhim qadam hisoblanadi.

7. Shuningdek yangi hukumat darhol xorijiy mamlakatlarda muhojir sifatida yashayotgan va ishlayotgan O‘zbekiston fuqarolarining huquqlarini himoya qilish, ularning qonuniy mehnat qilishlarini ta’minlash va vatanlari O‘zbekistonga muammosiz kelib ketishlari uchun Rusiya va boshqa davlat hukumatlari bilan shartnomalar tuzishi kerak.

8. Poraxo‘rlikka qarshi, shuningdek xalq va davlat mulkini talon taroj qilishga qarshi qonuniy choralar ko‘rishni kuchaytirish va bu illatlarga qarshi ommaviy safarbarlik e’lon qilingani haqida O‘zbekiston xalqini ommaviy axborot vositalaridan uzluksiz xabardor qilib borish zarur. (Poraxo‘rlikka qarshi kurashning tafsilotlari uchun dasturning iqtisodiy islohotlar bo‘limiga qarang).

9. Islom Karimov diktaturasi tomonidan siyosiy, huquqiy, iqtisodiy, ijodiy va diniy faoliyatlari tufayli qatag‘on qilingan, qamoqqa tashlangan, surgun qilingan yoki boshqa shaklda tazyiq va ta’qiblarga uchraganlarni darhol qamoqxonalardan ozod qilish, ulardan davlat nomidan uzr so‘rab, nomlarini oqlash, ko‘rgan zararlari uchun moddiy ta’minot to‘lash, sog‘lig‘i zarar ko‘rganlarni davlat hisobidan bepul davolatish lozim.

10. Olti oydan bir yillik muddat ichida avvalo umumxalq saylov yo‘li bilan Mahallalar Xalq Majlislarini (MXM) saylash lozim. Shundan keyin bosqichma bosqich mahallala majlislarida saylangan vakillardan Tuman Majlislari, ularda saylangan vakillardan Viloyat Majlislari, ularda saylangan vakillardan O‘zbekiston Xalq Majlisi O‘XM, ya’ni O‘zbekiston Parlamenti tashkil qilinishi kerak. O‘XM (parlament) tashkil qilingandan keyin uch oy muddat ichida uning a’zolaridan yoki O‘XM a’zosi bo‘lmasa xalq tarafidan tanilgan ijtimoiy siyosiy faollardan 2 yoki 3 kishini O‘zbekiston Prezidenti lavozimiga umumxalq saylovi o‘tkaziladi. (Tafsilotlar uchun dasturning “Siyosiy islohotlar” bo‘limiga qarang).

6 BO‘LIM

YaNGI JAMIYaT VA DAVLATNING MAFKURASI

Bugungi kunda mustaqil O‘zbekiston davlati o‘zining qisqa tarixida juda muhim, ayni paytda o‘ta murakkab bosqichni boshdan kechirmoqda. Xalqimiz va davlatimiz uchun vaziyatning muhimligi O‘zbekistonni 25 yildir diktatorlik usuli bilan boshqarib kelayotgan Prezident Islom Karimovning boshqaruv davrining oxiriga yetib borayotganidir. Vaziyatning murakkabligi esa diktutura tuzumining davlatmizni va jamiyatimizni ijtimoiy siyosiy jihatdan boshi berk ko‘chaga kirgizib qo‘yganidir.

O‘zbekiston xalqi bundan keyin Islom Karimovni o‘z Prezdenti sifatida ko‘rishni istamaydi. Demak, vatanimizda zudlik bilan Karimovning rejimiga barham berish, jamiyat va davlat hayotining butun sohalarida tub islohotlar o‘tkazilishi zaruriydir.

Buning uchun esa avvalo davlat va jamiyat mafkurasida ma’nosi bo‘lmagan «O‘zbekiston kelajagi buyuk davlat» shiori o‘rniga “BU DUNYoDA VA OXIRATDA SAODATLI BO‘LISh UChUN ShAXS VA JAMIYaT HAYoTIDA MODDIY VA MA’NAVIY QADRIYaTLARGA BIR XIL O‘RIN BERAYLIK” mafkurasi o‘rin olishi kerak.

Bu mafkuraning avvalo insonlar qalbida, qolaversa jamiyat va davlat hayotida joriy qilinishi diniylik va dunyoviylikning bir birini rad qilish muammosini hal qiladi, ya’ni davlat diniy bo‘lsinmi, dunyoviy (sekulyar) bo‘lsinmi degan muammo hal qilingan bo‘ladi. Chunki Islom dini g‘arbda bo‘lgani kabi tarkidunyochilik dini emas va dinimiz o‘z qoidalari doirasida insonlarga eng mukammal dunyoviy qadriyatlarni ta’minlaydi. Bu bilan ayni paytda jamiyat va davlat taraqqiyotining o‘rta, mo‘’tadil, har qanday radikallikdan uzoq taraqqiyot yo‘li tanlangan bo‘ladi. Bu esa o‘z o‘rnida vatanimizda hozirgi juda murakkab ijtimoiy siyosiy vaziyatda islohotlarni amalga oshirishning asosiy sharti bo‘lgan ijtimoiy siyosiy barqarorlikni, ya’ni tinchlikni saqlab turishning kafolati ham hisoblanadi.

Albatta, jamiyatda TINChLIK ustun bo‘lishi uchun siyosiy va iqtisodiy islohotlar o‘tkazilib, fuqarolarga turli erkinliklar berilishi va ularning moddiy ahvoli yaxshilanishi lozim. Ammo hammamizga ma’lum bo‘lgani kabi TINChLIK jarayoni avvalo insonlarning qalblarida va shuurlarida boshlanishi, ya’ni hikmatli va serma’no MAFKURAGA tayanishi kerak. Men yuqorida taklif qilgan mafkura musulmon xalqimizning e’tiqodiga ham mosdir.

7 BO‘LIM

SIYoSIY ISLOHOTLAR: BOSQIChMA BOSQICh SAYLOV QOIDASI

Siyosiy sohaning islohoti Islom Karimov rejimini o‘rtadan ko‘tarib tashlashdagi eng muhim islohotlardan biridir. O‘zbekiston mustaqil bo‘lgandan keyin mamlakatimizdagi diktatura rejimi yolg‘onga asoslangan va xo‘jako‘rsinga o‘tkazilgan “saylovlar” yo‘li bilan o‘z hokimiyatini asrab keldi. 25 yil davomida biron marta ham O‘zbekiston Prezidentligi, Parlament va mahalliy idoralarni tashkil qilishda erkin va adolatli saylovlar o‘tkazilmadi.

Shu bilan birga hozirgi vaziyatda, ya’ni mamlakatda chuqur ijtimoiy, siyosiy va iqtisodiy bo‘hron hukmron bo‘lgan shartlarda parlament va prezidentlik saylovlarini g‘arb davlatlaridagi kabi ko‘ppartiyaviylik asoslangan demokratik qoidalar bilan o‘tkazib bo‘lmaydi. Bu juda katta siyosiy bo‘hronlar, milliy va diniy nizolarga olib kelishi mumkin. Faqat bu haqiqat, Islom Karimov diktuturasining qatag‘onlarini oqlamaydi. Shu bilan birga bu haqiqat diktaturani tugatish uchun lozim bo‘lgan o‘tish davrida inson huquqlarining, erkinliklarning, fuqarolarning erkin mehnat, tadbirkorlik qilish va erkin tijorat bilan shug‘ullanish haqlarini bekor qilishni, xalqimizning o‘z e’tiqodiga mos keladigan fuqaroviy jamiyat qurish huquqi, ya’ni o‘zining rahbarini o‘zi saylash kabi huquqlarini ham bekor qilmaydi.

Shuning uchun ham bunday vaziyatda hokimiyatning markaziy va mahalliy idoralarini tashkil qilish uchun quyidagi bosqichma boschiq saylov qoidasiga amal qilish zarur:

Bunday saylovlarda ushbu qoidalarga amal qilinadi: A) Saylovlar oshkoralik ruhida va adolatli shartlarda o‘tkaziladi. B) Saylovlarda nomzod bo‘ladiganlarning foydali ilmli, e’tiqodli, yaxshi axloqli, adolatli va biror sohada mutaxassis, xalq ichida e’tiborli va obro‘li bo‘lishiga e’tibor qaratiladi. V) Saylovlarda hammaga o‘z dasturini tanitish uchun teng imkoniyatlar beriladi. G) Saylov natijalariga hamma rozi bo‘lishi kerak bo‘ladi.

Birinchi bosqichda, O‘zbekistondagi butun mahallalarda (5000dan 20000 mingacha aholi yashaydigan hududlarda) Mahallalar Majlislarini (MM) tashkil qilish uchun umuxalq saylovlari o‘tkaziladi. Ushbu usul bilan har mahallaning 50 vakildan (100 ham bo‘lishi mumkin) iborat MM saylanadi. MM o‘z Oqsoqolini va uning yoramchilarini saylaydi. MM o‘z hududida ta’lim tarbiya, huquq tartibot ishlarining saqlanishiga va boshqa ijtimoiy va tashiliy masalalar uchun mas’ul hisoblanadi. Har bir Mahalla boshqaruvining Tuman boshqaruvidan kelgan davlatning umumiy siyosatiga oid ta’limotlarga itoat qilishi shart bo‘ladi.

Ikkinchi bosqichda, Mahallalar Majlislarida Tuman Majlislari vakillarini saylash uchun saylov o‘tkaziladi. Bu bosqich saylovlarda ham saylovlarni o‘tkazishning va nomzodlarni tanlashning yuqorida aytilgan umumiy qoidalariga amal qilinadi. Shu shaklda butun Tumanlarda 100 (150 ham bo‘lishi mumkin) vakildan iborat Tuman Majlislari (TM) tashkil qilinadi. TM tuman hokimini, uning o‘rinboslarlarini va boshqa rahbarlarni saylaydi va o‘z tumani hududida ijtimoiy, iqtisodiy, ta’lim, huquq tartibot va boshqa sohlardagi ishlarni tashkil qilish va boshqarishdan mas’ul hisoblanadi. Har bir Tuman boshqaruvining Viloyat boshqaruvidan kelgan davlatning umumiy siyosatiga oid ta’limotlarga itoat qilishi shart bo‘ladi.

Uchinchi bosqichda, Tuman Majlislarida Viloyat Majlislari vakillarini saylash uchun saylov o‘tkaziladi. Bu bosqich saylovlarda ham saylovlarni o‘tkazishning va nomzodlarni tanlashning yuqorida aytilgan umumiy qoidalariga amal qilinadi. Shu shaklda butun Viloyatlarda 150 -(200 ham bo‘lishi mumkin) vakildan iborat Viloyat Majlislari (TM) tashkil qilinadi. VM viloyat hokimini, uning o‘rinboslarlarini va boshqa rahbarlarni saylaydi va o‘z viloyati hududida ijtimoiy, iqtisodiy, ta’lim, huquq tartibot va boshqa sohlardagi ishlarni tashkil qilish va boshqarishdan mas’ul hisoblanadi. Har bir Viloyat boshqaruvining O‘zbekiston Xalq Majlisi (Parlamenti), Prezidenti va boshqa markaziy idoralaridan kelgan davlatning umumiy siyosatiga oid ta’limotlarga itoat qilishi shart bo‘ladi.

To‘rtinchi bosqichda, butun Viloyat Majlislarida O‘zbekiston Xalq Majlisi (O‘XM, ya’ni Parlamenti) vakillarini saylash uchun saylovlar o‘tkaziladi. Bu bosqich saylovlarda ham saylovlarni o‘tkazishning va nomzodlarni tanlashning yuqorida aytilgan umumiy qoidalariga amal qilinadi. Shu shaklda 250 (350 ham bo‘lishi mumkin) vakildan iborat O‘zbekiston Xalq Majlisi (O‘XM, ya’ni Parlamenti) tashkil qilinadi. O‘XM vazifalari qisqacha qo‘yidagicha bo‘ladi: O‘XM Raisi, Rais o‘rinbosarlari, qo‘mitalar va qo‘mitalar rahbarlarini saylash. O‘zbekiston davlatida butun ijtimoiy sohalar tashkil qilish va boshqarish uchun qonunlar qabul qilish. Bu qonunlarning ijrosini nazorat qilish. O‘zbekiston Prezidentligi 2 yoki 3 nomzodni tanlab olib, bu lavozimga umumxalq saylovi o‘tkazish. Prezident tarafidan nomzodi ko‘rsataladigan vazirlar va davlatning boshqa markaziy idoralarining rahbarlarini bu lazozimlarga tasdiqlash. O‘zbekiston Bosh Prokurori va Davlat Mahkamalari, Asosiy Qonun Mahkamasi (Konstitutsion Sud), viloyat va tuman mahkamalarining a’zolarini saylash. O‘XM boshqa vazifalari ham bo‘lishi mumkin. O‘XM faoliyati alohida qonun bilan tartibga solinadi.

Beshinchi bosqich saylovlar, ya’ni O‘zbekiston Prezidentligiga saylovlarinio‘tkazish. O‘zbekiston Xalq Majlisi tashkil qilinib, o‘z faoliyatini boshlagandan keyin 3 oy muddat ichida o‘tkaziladi. Bu bosqich saylovlarda ham saylovlarni o‘tkazishning va nomzodlarni tanlashning yuqorida aytilgan umumiy qoidalariga amal qilinadi. O‘zbekiston Prezidentligiga 2 yoki 3 nomzod O‘zbekiston Xalq Majlisida tanlanadi va Prezident umumxalq saylovi yo‘li bilan saylanadi. O‘zbekiston Prezidenti Davlatning rahbari va qurolli kuchlarning Bosh qo‘mondoni hisoblanadi. Uning asosiy vazifalari quyidagilardan iborat bo‘ladi: Davlat Ijro hokimiyatini boshqarish va buning uchun Vazirlar Mahkamasini tashkil qilish. Vazirlar va markaziy davlat idoralariga rahbarlari nomzodlari O‘XM tasdiq uchun taklif qilish. Prezident O‘XM Raisi bilan hamkorlik qilgan holda IIV, MXX rahbarlari ham a’zo bo‘ladigan Davlat Xavfsizlik Kengashini tuzadi va uning faoliyatini boshqaradi. O‘zbekiston Prezidentining vazifalari alohida qonun bilan belgilanadi.

8 BO‘LIM

HUQUQIY ISLOHOTLAR: ERKINLIK VA ADOLATNI BIR BIRIGA BOG‘LASh

Huquqiy sohada asos insonlarning joni, aqli, mol mulki, nasli va obro‘ e’tiborining daxlsizligini ta’minlaydigan adolatli qonunlarni joriy qilishdir. Bu qonunlar doirasida fuqarolarga so‘z va matbuot erkinligi, ijtimoiy va madaniy tashkilotlar tuzish erkinligi, namoyish va majlislar o‘tkazish erkinligi kabi erkinliklar beriladi.

Shu bilan birga huquq va qonunlarning ustunligini ta’minlash uchun Davlat Mahkamasi, viloyat va tuman mahkamalarining ijro hokimiyatidan mustaqilligining ta’minlanishi shartdir. Bunday qilinganda davlatning rahbarlari ham, oddiy fyqarolar ham huquq va qonunlar oldida teng hisoblanadilar va jinoyat sodir qilganlarida adolatli qonunlar oldida javob beradilar.

9 BO‘LIM

IQTISODIY ISLOHOTLAR: HALOL MEHNAT, XUSUSIY MULKChILIK, ERKIN TIJORAT VA TADBIRKORLIK. DAVLAT XALQNI BOQMAYDI, XALQ O‘ZINI HAM, DAVLATNI HAM BOQADI.

Hozirgi kunda O‘zbekistonda amalga oshirilishi lozim bo‘lgan islohotlardan biri iqtisodiy sohadagi islohotlardir. Islom Karimov o‘zining siyosatchi emas (siyosatchi bo‘lmasa 26 yildir siyosiy mansabni nega egallab o‘tiribdi!?) iqtisodchi ekanligi bilan maqtansada, mustaqillikdan keyingi o‘tgan davrda O‘zbekiston iqtisodiy tamoman vayron holga keldi va vatanimiz dunyoning eng kambag‘al davlatlaridan biriga aylandi. Xalqaro manbalarga ko‘ra iqtisodiy taraqqiyotning asosiy ko‘rsatkichi bo‘lgan Yalpi Ichki Mahsulotning (YaIM) kishiga boshiga tushadigan nisbati bugun 1900 dollardir. Bu ko‘rsatkich Qozog‘izston va Turkiyada 12 000 dollar, Norvegiyada esa 50000 dollarga yaqindir. Bunday iqtisodiy bo‘hron natijasida O‘zbekistondan mehnatga layoqatli eng kamida 6 million kishi ish va non izlab chet mamlakatlarda darbadar bo‘lib yuribdilar.

Iqtisodiy sohani isloh qilish uchun uni 3 ga bo‘lish maqsadga muvofiqdir: 1. Davlat nazorat qiladigan strategik soha. Bu oltin, neft, tabiiy gaz, harbiy sanoat va hk iqtisodiy sohalardir. 2. Davlat xalqqa ijaraga beradigan strategik ahamiyatga ega bo‘lmagan korxonalar. Shu jumladan yer ham haqiqiy ma’noda fermerlarga ijraga berilishi kerak, hozirgidek xo‘jako‘rsinga emas. 3. Aholi to‘liq mulk egasi bo‘ladigan o‘rta va kichik korxonalar va boshqa iqtisodiy sohalar.

Bunday iqtisodiy islohotlar natijasida fuqarolarimiz haqiqiy ma’noda erkin mehnat, tadbirkorlik va tijorat bilan shug‘ullanish huqukini qo‘lga kiritadilar va bu qisqa muddatda insonlarning moddiy ahvolining yaxshi tomonga o‘zgarishiga olib keladi.

Iqtisodiy sohani bunday 3 bo‘limga bo‘lish va bu asosda islohotlar o‘tkazish bilan birga uni izdan chiqarayotgan sudxo‘rlik, poraxo‘rlik, o‘g‘rilik, davlat va xalq mulkini talon taroj qilishga qarshi adolatli qonunlar asosida haqiqiy kurash boshlatiladi.

Shu bilan soliq va bojxona qonunlari yangi sharoitda moslashtirilib, xalqimizning erkin mehnat bilan o‘zini va davlatini ta’minlashi uchun imkoniyatlar yaratiladi.

O‘zbekistonga qo‘shni bo‘lgan O‘rta Osiyo davlatlari bilan umumiy iqtisodiy bozor sohasi tashkil qilinib, O‘zbekistonda ishlab chiqarilgan mahsulotlar va tovarlarni bu umumiy bozorda va dunyoning boshqa mamlakatlariga sotish (eksport qilish) qulaylashtiriladi.

O‘zbekistonda Karimov diktaturasining tugatilish bilan mamlakatmizga chet davlatlardan sarmoya kelishi ham hech shubhasiz jiddiy mifdorda ortadi.

Bunday iqtisodiy islohotlar natijasida yaqin 5 yillik muddatda Yalpi Ichki Mahsulotning kishiga boshiga tushadigan nisbatini 10 000 dollar yoki undan ham ko‘proqqa yetkazish imkoni paydo bo‘ladi.

10 BO‘LIM

DIN SOHASIDAGI O‘ZGARIShLAR: ISLOM DINI IMONSIZLIK, YoLG‘ON, ZULM, PORAXO‘RLIK VA AXLOQIY TUBANLIKLARNI YO‘Q QILADIGAN YaGONA ChORADIR.

Ma’lum bo‘lgani kabi Islom dini Alloh taolo insonlarga nozil qilgan so‘ng ilohiy Kitob Qur’oni Karimga va payg‘ambarlarning oxirgisi Muhammad (sav)ning sahih Sunnatlariga asoslanadi. Islom dinining asosiy qoidalari shulardan iboratdir:

Yakkaxudolikka imon keltirish va buning ziddi bo‘lgan ko‘pxudolikni, ya’ni Alloh taologa shirk keltirishni rad qilish va Muhammad (sav)ning Allohning bandasi va payg‘ambari ekanligiga imon keltirishdir.

Islom dinining g‘arb dunyosidagi va boshqa mamlakatlardagi din tushunchasidan farq qiladi. G‘arb dunyosida “din” deyilganda insonlarning shaxsiy e’tiqodi va tarkidunyochilik, ya’ni inson hayotidagi moddiy qadriyatlarga e’tibor bermaslik tushuniladi. Shuning uchun ham g‘arb dunyosida bunday dinni dunyo ishlariga, ya’ni ijtimoiy hayotga aralashtirmaslik uchun dunyoviylik (sekularizm) qoidasiga amal qilinadi.Islom dinida esa ham moddiy va ma’naviy qadriyatlarga bir xil darajada o‘rin beriladi, ular bir birini inkor qilmaydi, aksincha bir biriga ma’no beradi. Bu bilan insonlarning bu dunyoda hayotida ham, oxirat hayotida ham saodatli bo‘lishi nazarda tutiladi. Demak, Islom dinining o‘z dunyoviylik qoidalari bor va shu sababdan musulmonlar ko‘pchilikni tashkil qiladigan jamiyatlarda g‘arbliklarni ijtimoiy hayotida o‘rin olgan dunyoviylik (sekularizm) qoidasiga ehtiyoj bo‘lmaydi.

Islom dinining namoz o‘qish, ro‘za tutish, zakot berish, hajga borish kabi ibodatlarini ado etish juda qulay va musulmonlardan juda oz vaqt ajratishni talab qiladi.

Shu bilan birga Islom dini halol bo‘lgan narsa va amallarni harom bo‘lgan narsa va amallardan ajratadi, insonda yaxshi aloqiy xislatlarni tarbiyalaydi.

Hozirgi kunda O‘zbekistondagi ijtimoiy hayotning inqirozia sabab bo‘lgan IMONSIZLIK, YoLG‘ON, ZULM, PORAXO‘RLIK VA AXLOQIY TUBANLIKLARNI YO‘Q QILADIGAN YaGONA ChORA ISLOM DINIDIR.

Islom Karimov diktaturasida eng ashaddiy qatag‘onlar Islom dini va uning vakillariga qarshi o‘tkazilib kelaytgani O‘zbekistonda ham, chet davlatlarda ham juda yaxshi ma’lumdir. Bu diktutura minglarcha nogunoh musulmonlarni radikalizm va boshqa soxta ayblar bilan o‘ldirdi, o‘n minglarchasi “Jaslik” konslageri kabi qamoqxonalarda vahshiylarcha qiynadi va qiynamoqda. Shuningdek, O‘zbekistonda soni 10 mingga yaqinlashgan masjid va jome’lar soni bugungi kunga kelib 2 mingdan ham oz bo‘lib qoldi.

Islom dini bilan aloqali jamiyatda qilinishi kerak bo‘lgan o‘zgarishlar quyidagicha bo‘lishi zarur, deb hasoblayman:

Birinchidan, Islom dinining asosi bo‘lgan tavhidiy imon, uning ibodatlari, ijtimoiy, ilmiy, axloqiy va oilaviy qoidalari sodda shaklda insonlarga tushuntirilishi kerak. Bu shaklda asosiy qismi musulmonlardan iborat bo‘lgan xalqimiz o‘z dinini qulay va nisbatan tez muddatda yaxshi o‘rganish imkoniga ega bo‘ladi.

Ikkinchidan, hozirgi kunda musulmon mamlakatlarda Islom dinini juda yaxshi o‘rgangan va ilmi bilan amal qiladigan juda ko‘p ahli ilmlarimiz bor. Ularning ishtirokida Mustaqil Ulamolar Kengashini tuzish o‘ta muhimdir. Bu Kengashning vazifasi xalqimizga Islom dinini o‘rgatish dasturini hozirlash, musulmonlar orasidagi turli guruhlarni o‘rtasida o‘zaro birlik va hamkorlikni ta’minlash va diniimizning ibodat, axloq, halol va haromga oid va ijtimoiy qoidalarini shaxs va jamiyat hayotiga joriy qilishning usulllarini ishlab chiqish va bularni amalga oshirishda davlat va hukumat organlari bilan hamkorlik qilishdir.

Mana shunday Islomiy o‘zgarishlar natijasida jamiyatda asta sekinlik imoniylik, yaxshi axloq, toat ibodatlilik, insonlar orasida o‘zaro mehr shafqat ortib boradi, musulmonlarning turli guruhlarga bo‘linib o‘zaro nizo qilishlariga yo‘q qo‘yilmaydi, musulmonlarning bu dunyo va oxirat hayotida saodatli bo‘lishlari uchun imkonlar paydo bo‘ladi, insha Alloh!

11 BO‘LIM

TA’LIM TARBIYa TIZIMI ISLOHOTI VA JAMIYaTDA OILANING ROLI. IJTIMOIY ADOLAT VA TIBBIYoT SOHASINI TARAQQIY QILDIRISh

Maorif, ta’lim tarbiya sohasida islohotlarni amalga oshirish xalqimizning yangi avlodlarining jismoniy va ma’naviy jihatdan barkamol bo‘lib yetishishining, shu bilan birga vatanimiz va davlatmizning kelajakda inqirozga yuz tutmay, butun ijtimoiy sohalarga taraqqiyot qilishining asosidir.

Buning uchun avvalo shaxslarning imonli, yaxshi axloqli, toat ibodatli, dunyoviy ishlarda mohir mutaxassislar bo‘lib ketishini ta’minlanishi kerak. Mana shunday musulmon erkalar va ayollardan tashkil topadigan oilalarda bolalarni chaqaloqlik davridan to‘g‘ri tarbiya qilish imkoni yaratiladi. Ta’lim tarbiyaning keyingi bosqichi esa, boshlang‘ich, o‘rta, maxsus va oliy ta’lim dargohlaridir. Bu ta’lim va tarbiya dargohlarida dunyoviy ilmlarning islomiy ilmlar bilan birgalikda o‘rgatilishi yosh avlodlarning imonli va yaxshi axloqli bo‘lib o‘sishi bilan birga, diniy ta’limni davlat nazoratidan chiqarish, buning natijasida turli o‘zaro raqobat va hatto xusumat qilishi mumkin bo‘lgan turli diniy oqimlarning o‘rtaga chiqishiga to‘siqlik ham qiladi.

Ta’lim tarbiyaning butun bosqichlari va sohalarining davlatning nazoratida bo‘lishi, turli ijtimoiy tabaqalarga bir xil, bepul ta’lim tarbiya berish imkonini yaratish ham davlatning asosiy vazifalaridan biridir.

Davlat shuningdek, yetimlar, kimsasizlar, qariyalar, homilador va yosh bolali onalarni nafaqalar bilan ta’minlash majburiyatidadir. Bu bilan jamiyatda ijtimoiy adolat o‘rnatiladi.

Tibbiy sohaning taraqqiy qilishi mamlakat va davlatning avvalo iqtisodiy jihatdan kuchli bo‘lishiga, insonlar iste’mol qiladigan suv, oziq ovqatlarning tabiiyligiga va atrof muhitning tozaligiga bog‘liqdir. Davlat o‘z fuqarolarining sihatini qo‘rish uchun to‘g‘ri siyosat olib borishi va kasalxonlarda bepul davolanishni yo‘lga qo‘yishi zarur.

12 BO‘LIM

PORAXO‘RLIK VA DAVLAT MULKINI TALON TAROJ QILIShGA QARShI KURASh

Hozirgi kunda O‘zbekistondagi diktaturaning eng jirkanch natijalaridan biri jamiyat va davlat hayotining butun sohalarida poraxo‘rlik, ta’magirlik, xalq va davlat mulkini o‘g‘irlashning beqiyos darajada tarqalganligi, ya’ni ommaviy tus olganligidir. Davlat idoralari uchun oddiy holga aylangan bu illatning, ta’lim tarbiya va hatto diniy idora faoliyatida (masalan, umra va hajga borishdagi poraxo‘rliklar) o‘rin olishini bir milliy fojea sifatida baholash mumkindir.

Poraxo‘rlik, ta’magirlik, xalq va davlat mulkini o‘g‘irlashga qarshi quyidagi chora va tadbirlar ishlatishi lozim:

Avvalo O‘zbekistonda Karimov diktatursi tugatilib, ushbu dasturda bayon qilingan mafkuraviy, siyosiy, huquqiy, iqtisodiy va ta’lim tarbiyaviy islohotlar amalga oshirilishi shart. Shunda jamiyatda qonun va huquqlarning ustunligi ta’minlanadi, fuqarolarda imon va taqvo xususiyatlari paydo bo‘ladi, iqtisodiy isdlohotlar natijasida umumiy kambag‘allik o‘rtadan ko‘tarilib, har bir shaxs va korxonalar uchun halol mehnat, qonunlarga ko‘ra faoliyat va halol foydaga ega bo‘lish imkoni yaratiladi. Bu esa o‘z o‘zidan insonlar qalbida va jamiyatda to‘g‘rilik va adolatning ustun bo‘lishiga olib keladi.

Shu bilan birga poraxo‘rlik, ta’magirlik, xalq va davlat mulkini o‘g‘irlashga, davlat idoralarida bunday illatlar bilan shug‘ullanidiganlarga qarshi qat’iy qonuniy choralar ko‘rilishi kerak bo‘ladi. Ba’zi davlatlarda bunday jinoyatlarga qarshi o‘lim jazosi ishlatilishi ham ma’lum. O‘zbekistonda esa o‘tish davrida bunday jinoyat qilganlarga eng kamida 10 yildan 15 yilgacha qamoq jazosi berilib, poraxo‘rlik va o‘g‘rilik bilan ortirgan mol mulki musodara qilinishi kerak, deb hisloblayman.

13 BO‘LIM

ISLOM KARIMOV OILASINI JINOIY JAVOBGARLIKKA TORTISh VA ULAR O‘G‘IRLAGAN PULLARNI O‘ZBEKISTONGA QAYTARISh

Islom Karimov nafaqat diktator sifatida O‘zbekiston xalqi va davlatiga qarshi mislsiz jinoyatlar sodir qildi, balki uning oilasi, ya’ni xotini va qizlari Gulnora va Lola Karimovalar ham otalarning qo‘llab quvvatlashi natijasida juda katta huquqiy, iqtisodiy va ma’naviy jinoyatlarga qo‘l urdilar. Bu yerda Tat’yana Karimovaning jiyani Akbarali Abdullayevning ko‘ra bir necha korxonadan «naqd ko‘rinishda 800 million AQSh dollaridan oshiqroq» mablag‘ni noqonuniy o‘zlashtirishda ayblangani (bu haqda“Ozodlik” radiosi xabar ham bergandi), Gulnora Karimovaning O‘zbekistonda va Shvetsariya, Shvetsiya va Norvegiya kabi davlatlarda iqtisodiy jinoyatlarga sherik bo‘lgani, Gulnora va Lola Karimovalarning O‘zbekistondan o‘g‘irlangan 1 Milliard dollarga yaqin pulni g‘arb davlatlaridagi banklarida saqlayotganini aytishning o‘zi bu oilaning xalqimiz va davlatimizga qarshi qanday qabih jinoyatlar qilganini tushunib yetish uchun yetarlidir.

Islom Karimov umrining oxirigacha o‘z mansabini tark qilmaslikka qaror berganing asosiy sababi ham o‘zining bu jinoyatlar uchun javob berishdan qattiq qo‘rqishidir. Karimov umrbod taxtida o‘tiradimi yo‘qmi, buni faqat kelajak ko‘rsatadi. Bu amalga oshganda ham uning xotini, qizlari va ularning yaqinlari albatta yaqin kelajakda qilgan jinoyatlari uchun adolatli qonunlar oldida javob berishlari kerak bo‘ladi.

Gulnora va Lola Karimovalarning O‘zbekistondan o‘g‘irlangan va g‘arb davlatlaridagi banklarida saqlanayotgan 1 Milliard dollarga yaqin pullarni qaytarish uchun xalqaro qonunlar doirasida bu hukumatlarga Karimov oilasining jinoyatlariga dalil bo‘ladigan butun hujjatlar bilan murojaat qilinadi. Bu pullar qaytarilishi uchun bu davlatlar bilan yaxshi iqtisodiy aloqalar va shartnomalar tuzish ham shart sifatida qo‘yilishi mumkin.

14 BO‘LIM

TAShQI SIYoSAT: DO‘STLAR BILAN DO‘STONA, DO‘ST BO‘LMAGANLAR BILAN ShARTNOMA ASOSIDA XALQARO MUNOSABATLAR O‘RNATISh

Tashqi siyosatda zudlik bilan O‘zbekiston, Qozog‘iston, Tojikiston, Qirg‘iziston va Turmaniston o‘rtasida Ovrupo Ittifoqiga o‘xshash, faqat musulmon xalqlarimizning e’tiqodiy va yaxshi axloqiy xususiyatlarini hisobga olgan holda O‘rta Osiyo davlatlari Ittifoqini tuzish va bu davlatda umumiy iqtisodiy va madaniy hududni tashkil qilish.

O‘rta Osiyo davlatlari orasida bunday Ittifoqning tuzilishi xalqlarimizning ma’naviy, madaniy, iqtisodiy taraqqiyotiga hissa qo‘shgani kabi, insonlarimiz orasida qarindosh -urug‘chilik, quda -andallikning rivojlanishiga, milliy va boshqa nizolarning oldini olishga ham zamin yaratadi.

Shu bilan birga O‘zbekiston Turkiya va aholisi asosan musulmonlardan iborat boshqa davlatlar bilan do‘stona munosabatlar o‘rnatishi, qolgan davlatlar bilan esa o‘zaro mnafaatlarni hisobga oladigan shartnomalar asosida munosabatlar o‘rnatishi maqsadga muvofiqdir.

15 BO‘LIM

DIQQAT: BU DASTUR O‘TISh DAVRIGA MO‘LJALLANGANDIR

Mana shunday sodda ayni paytda jamiyat va davlat hayotida ijtimoiy va siyosiy larzalarga sabab bo‘lmaydigan dastur asosida asta sekinlik bilan va bosqichma- bosqich Karimov diktaturasi keltirib chiqargan ijtimoiy, siyosiy, ma’naviy va iqtisodiy bo‘hrondan qutulish mumkin, deb hisoblayman

Ya’ni, bu dastur Islom Karimov diktutarsidan qutulish va yangi jamiyat va davlat qurishda mutlaqo zarur bo‘lgan O‘TISh DAVRIGA mo‘ljallangandir.

Bunday O‘tish Davrining muvaffaqiyatli o‘tayotganiga mamlakatimizda erkinliklar sharoitida ijtimoiy va siyosiy barqarorlikning (tinchlik) o‘rnatilgani, iqtisodiy taraqqiyotning, madaniyat va ma’naviyatning, huquq va qonunlar ustunligining shaxslar va jamiyat hayotida o‘rin olayotgani, insonlarimizning, ayniqsa yangi avlodlarning foydali ilmlar, yaxshi axloq va yaxshi mutaxassislar bo‘lib yetishayotgani, O‘zbekiston davlatining O‘rta Osiyoda va dunyoda obro‘ e’tiborining oshib borayotgani dalil bo‘la oladi. O‘tish davri tugagandan keyin esa xalqimiz uchun uning e’tiqodiga, ma’naviyatiga va tarixiga mos keladigan yanada taraqqiyparvar bir jamiyat va davlat qurish imkoni paydo bo‘ladi.

QISQA XULOSALARIM

Birinchi qisqa xulosam: Ushbu dastur e’lon qilingandan keyin O‘zbekistondagi diktatura rujimi bu dasturni O‘zbekiston Konstitutsiyasiga zid, meni esa Konstitutsiyaga tajovuz qiluvchi shaxs, deya e’lon qilishi mumkin. Avvalo O‘zbekistonning hozirgi Konstitutsiyasiga tajovuz qilayotgan Islom Karimovning shaxsan o‘zidir. U to‘rt marta Prezidkentlikka nomzod bo‘lish va ikki marta O‘zbekiston Konstitutsiyasiga o‘zgartirishlar kiritish bilan o‘zining Prezidenlik muddatini yana ikki marta noqonuniy uzaytirishi bu Konstitutsiyasini oyoq osti qilganiga dalildir. Qolaversa, mening ushbu dasturim unda aytilgani kabi xalqimizning e’tiqodiy va ma’naviy qadriyatlari hamda umuminsoniyat taraqqiyotining ijobiy tajribalariga asoslanadi. Demak, bu dasturga amal qilish hech shak shubhasiz xalqimizning va davlatimizning manfaati uchun foydali bo‘ladi.

Ikkinchi qisqa xulosam: Men O‘zbekiston prezidentligiga virtual saylovlarning tashkil qilinishini xalqimiz va ayniqsa Islom Karimov diktaturasiga qarshi kurashayotgan muxolifat faoliyatida juda muhim bir qadam va jarayon, deb bilaman. Chunki muxolifatning bu qadami va bu jarayon diktutura zulmiga qarshi bo‘lganlarga adolat uchun ovozlarini baralla chiqarishga, o‘z dasturlarini erkin maydonda o‘rtaga qo‘yishlariga, bu orqali xalqimizning butun taraqqiyparvar farzandlarining bir -birlarini tanishlariga va kelajakda vatanimiz va davlatmiz ravnaqi uchun o‘zaro hamkorlik qilishlariga imkoniyat ham yaratdi.

Men ushbu tashabbus bilan chiqqan butun muxolifatchilarga o‘z tashakkurimni bildiraman. Virtual saylovlardagi raqiblarimga yaxshi tilaklar izhor qilaman.

Virtual saylovlarda qaysi nomzod g‘olib kelishidan qat’iy nazar, saylovlar tugagangan keyin uni tashkil qilgan va unda ishtirok etgan muxolifatchilar, shuningdek Islom Karimov rejimning soxta saylovlarida emas, virtual bo‘lsa ham haqiqiy saylovlar bo‘lgan bu saylovlarda ovoz bergan butun hamyurtlarimizni o‘zaro hamkorlikka da’vat qilaman.

Hurmat bilan

Namoz NORMO‘MIN

10.02 2015