“TUG’YON” радиосининг бугунги эшиттиришида Франциядан мустақил тадқиқотчи, сиёсатшунос Камолиддин Раббимов иштирок этдилар.
Маълумки, сўнгги 15 йиллик давр мобайнида дунёни ларзага солаётган катта таҳдид ва муаммолардан бири бу – халқаро терроризм ҳамда диний радикализм ортидан кучайиб бораётган турли ҳил кўринишдаги бузғунчилик амалиётларидир.
Бунинг негизида дунё саҳнасига қалқиб чиққан Ироқ ва Шом Ислом Давлати, яъни, ИШИДнинг сўнгги йилларда дунёга таъсири кундан кунга ортиб бормоқда. Ўзларини «Исломий Давлат» дея атовчи бу гуруҳ бугун дунёнинг, айтиш мумкинки, биринчи рақамли таҳдид масканига айланди. Бугун дунёда ИШИД бир томонда бўлса, дунёнинг қолган қисми унга қарши томондадир, десак муболаға бўлмайди.
Буни ИШИД ва Ўзбекистон доирасида қарайдиган бўлсак, маълумотларга кўра, ўтган 2015 йилда ўзбекистонлик мусулмонлар ва айни пайтда хорижда юрган ўзбекистонликларнинг хавотирига сабаб бўлган, кимларнингдир ҳаётини билвосита, кимларнингдир ҳаётини бевосита ўзгартирган муҳим муаммолардан бири – ИШИД – собиқ «Ироқ ва Шом Ислом давлати», ҳозирги «Исломий давлат» террор гуруҳи сафида сони ортиб бораётган ўзбекистонликлар бўлиб қолди…
Турли манбаларга кўра, «Исломий давлат» сафидаги ўзбекистонликлар сони 500 нафар атрофида, деб тахмин қилинади. Лекин, бу борада аниқ рақамлар йўқ.
Масалан, Россия Федерацияси Ташқи Ишлар вазирлигининг 2015 йил охиридаги расмий маълумотига кўра, «Исломий Давлат» сафларида Россиядан тахминан 2000 нафар, Қирғизистондан 500 нафар, Ўзбекистондан 600, Тожикистондан 300, Туркманистондан 200 – 250 атрофида, Қозоғизстондан ҳам 200 – 250 нафар атрофида жангарилар бор. Ва бу рақамлар кундан кунга ўсиб бораётганидан хавотирлар кўп.
Умумий ҳисобда айтганда, турли манбаларга кўра, бугунги кунда «Исломий Давлат» сафларида дунёнинг 100 дан ортиқ мамлакатларидан келган 30 мингга яқин хорижий жангарилар жанг қилмоқдалар. Жангариларнинг мисли кўрилмаган ёвузликлари ва ваҳшиёна қотилликлари ҳамда дунё цивилизацияга оид маданий ва тарихий ёдгорликларни барбод қилаётганлигини санаб адоғига етиш қийин.
Суриядаги урушлар ва ҳунрезликларнинг ҳам охири кўринмайди…
admin
