Ҳуқуқ ҳимоячиларининг хабарига кўра, кеча, 17 январь куни кечга томон Фарғонадаги тергов ҳибсхонаси ёнида норозилик намойиши ўтказилди.
Унда 2004 йил сентябрида “Хизб-ут-Тахрир“га мансубликда ва “Хизб“чиларга ёрдам кўрсатишда (ўз уйидан бошпана беришда) айбланиб, қамоққа олинган ва шу кунларда Фарғона вилоят судида Ўзбекистон ЖКнинг бир неча моддалари бўйича иши кўрилаётган марғилонлик Ойша Аҳмедованинг яқинлари ва ҳуқуқ ҳимоячиларидан иборат, қарийб 15 киши қатнашди.
Суд залига 52 ёшли О.Ахмедованинг танаси шилинган ва моматалоқ ҳолда олиб келинганига шоҳид бўлароқ пикетчилар қамоқхонада қийноқларнинг ўзига хос усули қўлланилганини – махбуснинг ўзи билан сақланаётган безори рус аёли томонидан ваҳшиёна калтакланаётганини кескин қораладилар.
Уларнинг қўлларида “БМТ Ўзбекистон хукумати томонидан ўтказилаётган қийноқларга чек қўйсин“, “Турмада ётган муслима ва муслимларга зулм кўрсатаётган ўзбек хукумати истеъфога чиқарилсин!“, “Ислом Каримов президентликдан бўшатилсин!“, “Хукуматнинг истеъфосини талаб қиламан“ қабилидаги плакатлар бор эди.
Намойиш бир соатдан ортиқ давом этди.
admin
