Абдуллоҳ Бухорий суиқасди маҳкамада!
22 февраль куни Истанбулнинг 8-оғир жазо маҳкамасида Собир Шукуров ва Элдор Аслан устидан иккинчи суд мажлиси ўтади. Бу икки шахс 2014 йил 10 декабрь куни Истанбулдаги «Эҳсон Илм» жамияти раҳбари Абдуллоҳ Бухорийга қарши суиқасдда айбланади.
Биринчи суд мажлиси 2015 йил 23 октябрда ўтган. Унда иккала айбланувчи ҳам айбига иқрор бўлмаган.
Россияда туғилган, кейинчалик Туркия фуқаролигини олган Элдор Аслан биринчи бўлиб кўрсатма берган. У ўзининг суиқасдчи эмаслигини, ҳеч кимни ўлдирмаганини айтган. Ушланишдан уч-уч ярим ой олдин Собир билан Анталияда танишгани, Истанбулда олди-берди ишлари бор экан, бирга келиб айланишганини, шаҳарни билмагани учун йўлларни кўрсатганини қўшимча қилган.
Сўнгра Россия фуқароси Собир Шукуров таржимон воситасида кўрсатма берган. Бу айбловларни тан олмаслигини, Элдорга ҳеч қандай буюртма бермаганини айтган. Элдор билан 3 ой аввал Анталияда танишгани, Истанбулга Элдорнинг собиқ аёлини топиш учун келганини, шунинг учун Зейтинбурну маҳаллаларида айланганини айтган.
Собир Шукуров ҳақида Интерполдан маълумот олинишига қарор берилгач, суд мажлиси бошқа кунга қолдирилган.
Маҳкамада Туркия Жумҳурият прокурори тарафидан айбланувчи Собир Шукуровга нисбатан «Қасддан одам ўлдиришга буюртма бериш», Элдор Асланга нисбатан «Қасддан одам ўлдириш» моддаси бўйича умрбод қамоқ жазоси талаб қилинади.
Эслатиб ўтамиз, 2014 йил 10 декабрь куни Истанбулдаги «Эҳсон Илм» ижтимоий-маърифий жамияти биноси олдида жамият раҳбари Абдуллоҳ Бухорий отиб кетилган ва кейинроқ касалхонада жон берган. Марям ва Ҳавво исмли икки қизи етим қолган.
«Ўтюраклар Клуби» бу жараённи яқиндан кузатиб боради.
Fikr bildirish