Шу кунларда Германия парламенти – Бундестагнинг қуйи палатаси депутатлари Ўзбекистонда меҳмон бўлиб туришибди.
18 – сентябрь 2003 йил
Уларнинг Ўзбекистонга ташрифидан мақсад, Бундестагнинг бюджет комиссияси аъзоси Вальтер Шулернинг айтишича, республика расмийлари, нодавлат ташкилотлари, мухолиф партиялар вакиллари ва оддий фуқаролар билан мулоқот қилиб, бу ердаги сиёсий–ижтимоий ва иқтисодий вазият билан танишиш ҳамда Германиянинг моддий ёрдами билан амалга оширилаётган лойиҳаларнинг қандай бажарилаётганини, демократик жараёнларга ва оддий кишиларга қандай нафи тегаётганини кўришдир.
Бундестагнинг республика мухолифатига ҳам ёрдам кўрсата билишини таъкидлаган немис депутати: биз Ўзбекистон хукумати ва парламентини мухолиф партияларга шарт–шароит яратиб беришга ундаймиз, деди.
Бундестаг аъзолари 3 кундан бери Республика Олий Мажлиси раиси Эркин Халилов билан, давлат ва нодавлат ташкилотларининг вакиллари билан мулоқот қилдилар.
Ҳуқуқ ҳимоячиларининг хабарига кўра, меҳмонлар кеча, 17 сентябрда Наманганда бўлишиб, «Фридомхауз»нинг бу ердаги ресурс марказида Фарғона водийсидаги мустақил, нодавлат ташкилотларининг фаоллари билан учрашганлар. Очиқ–ошкора тарзда бўлган бу учрашувда Ўзбекистондаги ҳақиқий аҳволни кўрсатувчи турли мавзудаги масалалар кўтарилган, Республика хукуматининг кўпгина салбий хатти-харакатлари фош этилган.
Меҳмонлар эътирофича, мазкур учрашув уларнинг Ўзбекистон тўғрисидаги тасаввурларини буткул ўзгартириб, Республикадаги ҳақиқий аҳволни ойдинлаштириб берган.
Немис депутатлари билан бўлган учрашувда Фарғонадаги «Ўтюраклар» Клуби рахбари Мўътабар Тожибоева ҳам қатнашган. Улар ҳуқуқ ҳимоячисига уни ва дугонасини калтаклаганлар устидан 12 сентябрда очилган жиноий ишнинг адолатли олиб борилишини назорат қилишни ваъда берганлар.
Намангандаги учрашувда 30га яқин киши қатнашган.
admin
