Инсон ҳуқуқлари ҳимоячиси сиртдан суд қилинди
12 декабр куни Фарғонадаги «Ўтюраклар» Клуби рахбари, инсон ҳуқуқлари ҳимоячиси Мўътабар Тожибоева номига унинг сиртдан судланганлиги ҳақида маҳкамадан қарор келган.
Вилоятдаги Олтиариқ туман жиноий ишлар бўйича судидан юборилган бу қарорда Тожибоеванинг Ўзбекистон Республикаси маъмурий ҳуқуқбузарлик тўғрисидаги Кодекси 201-моддасида кўрсатилган ҳуқуқбузарликни содир этиш, яъни йиғилишлар, митинглар, кўча юришлари ёки намойишлар уюштириш ҳамда ўтказишда айбланиб, 16 минг 320 сўм миқдоридаги жаримага тортилгани маълум қилинади.
М.Тожибоеванинг билдиришича, у ўзи билан боғлиқ махкама жараёни ўтказилаётганидан хабарсиз бўлган. «Суд менинг қонунга асосан махкама жараёнида иштирок этишимни таъминлаши керак эди. Судья Вахобов бу харакати билан «Маъмурий Ҳуқуқбузарлик тўғрисидаги Қонун»нинг 294-моддасига хилоф иш қилган», – дейди Мўътабар Тожибоева. Унинг фикрича, махкама жараёни ҳақидаги маълумотлар кенг жамоатчилик эътиборига тушмаслиги учун шундай йўл тутилган кўринади.
«Ажабланарлиси шундаки, суд қарори орадан уч ой ўтиб, яъни 90 кундан кейин менга юборилган. Қонун бўйича ўн кун муддат ичида қарордан норози томон юқори боскич судга шикоят билан мурожаат қилиши мумкин. Бундан «одил» ҳакам менинг қайта шикоят қилишимни истамаслиги очиқ кўриниб турибди», – дейди Тожибоева.
Ҳуқуқ ҳимоячиси ўзига нисбатан Олтиариқ туман ИИБ томонидан тайёрланган хужжатларнинг қалбаки эканлигини айтади. «Ўтюраклар» Клуби рахбари бир йил ичида шундай қалбаки хужжатлар билан 4 марта махкамага тортилган ва барча суд жараёнларида унга кўйилган айбловлар ўз исботини топмаган.
2003 йил, 17 декабр
МУСУЛМОН ЎЗБЕКИСТОН
archive.muslimuzbekistan.com/uzb/uznews/…/uznews17122003.html
Fikr bildirish