Тақвимдаги бу кун Сан-Сальвадор архиепископи Оскар Арнульфо Ромеро-и-Гальдамес шарафига танланган. Монсеньёр Ромеро қашшоқлик, ижтимоий тенгсизлик, қотиллик ва қийноқларга қарши курашган. Ўз қарашлари учун архиепискон радикал оқимлар тарафдорлари томонидан таъқиб этилган ва охир-оқибат, ўлдирилган. Бу 1980 йилнинг 24 мартида содир бўлганди.
Бирлашган Миллатлар Ташкилоти вакиллари Оскар Ромеро томонидан амалга оширилган ишнинг қиммати ва аҳамиятини эътироф этишиб, архиепископ ўлдирилган кунга янги сана белгилашга қарор қилганлар.
“Монсеньёр Ромеро ҳимоя қилган қадриятларни, унинг инсониятга хизмат қилишга содиқлигини, унинг мулоқотга чорловини ва зўравонликнинг барча шаклларини рад қилганини эътиборга олган ҳолда, БМТга аъзо барча мамлакатлар ва халқаро ташкилотларга бу Халқаро кунни тегишли равишда нишонлаш таклиф қилинади”, дейилади БМТ Бош ассамблеяси резолюциясида.
Халқаро кун, биринчи навбатда, инсон ҳуқуқларини қўпол ва мунтазам равишда бузилиши қурбонларининг хотирасини ёдлаш ҳамда ҳақиқатни қарор топтириш ва адолатни ўрнатиш ҳуқуқининг аҳамияти ҳақида эслатиб қўйиш мақсадида ўтказилади. Бундан ташқари, бу кунда ўз ҳаётини инсон ҳуқуқлари учун курашга бағишлаган ёки бу курашда ҳалок бўлганларга эҳтиром кўрсатишга қаратилган тадбирлар ўтказилади.
“Қийноқларсиз ҳаёт” ташаббус гуруҳи “Ўтюраклар клуби” инсон ҳуқуқларини ҳимоя қилиш халқаро ташкилоти бутоқларидан бири бўлиб ҳисобланади ва ўз фаолиятини ташкилот миссиясига мувофиқ равишда олиб боради.
“Қийноқларсиз ҳаёт” ташаббус гуруҳи ўз олдига қуйидаги мақсадларни қўйган:
– қийноқ ва зўравонлик қурбонлари билан алоқа ўрнатиш, уларга нисбатан қўлланилган қийноқларни ошкор қилиш бўйича улар билан музокаралар олиб бориш, қийноқлар тўғрисидаги маълумотларни йиғиш, Интернетда, шу жумладан, “Жараён” веб-сайтида чоп қилиш учун қийноқлар бўйича материаллар тайёрлаш;
– қийноқ қурбонларининг гуруҳ фаолиятида иштирок этишини таъминлаш;
– Ўзбекистондаги инсон ҳуқуқлари билан боғлиқ вазият кўриб чиқиладиган халқаро анжуманларда қийноқ қурбонларининг шахсан иштирок этишини ташкил этиш;
– келажакда қийноқ қурбонлари учун ҳуқуқий, психологик ва моддий ёрдам ташкил этиш;
– Ташаббус гуруҳи вакилларининг “Ўтюраклар клуби” инсон ҳуқуқларини ҳимоя қилиш халқаро ташкилоти томонидан ташкил этилган барча тадбирларда фаол иштирок этиши.
“Қийноқларсиз ҳаёт” ташаббус гуруҳи
Fikr bildirish